আজি ৰঙৰ উৎসৱ ফাকুৱা ; আবিৰৰ ৰঙেৰে ৰঙীন হৈছে ৰাজ্যৰ চৌদিশ

ডিজিটেল ডেস্কঃ প্ৰকৃতিৰ বুকুলৈ পুনৰ ঘূৰি আহিছে ঋতুৰাজ বসন্তৰ আগজাননী। শীতৰ ৰুক্ষতা নেওচি ফাগুনৰ পচোৱা বতাহে যেন চৌদিশে এক মাদকতা সিঁচি দিছে। এই পৰিৱৰ্তনৰ মাজতে বৰ্তমান ৰাজ্যৰ বিভিন্ন প্ৰান্তত দেখিবলৈ পোৱা গৈছে এক অনন্য দৃশ্য— ডাল ভৰি ফুলি উঠিছে ৰঙা পলাশ।

প্ৰকৃতিৰ অপূৰ্ব ৰূপান্তৰ শুকান ডালবোৰত যেন কোনোবাই ৰঙা আবিৰহে সানি দিছে। পলাশৰ লগতে শিমলু আৰু মদাৰৰ ৰঙা ৰঙে প্ৰকৃতিৰ কেনভাচখন সম্পূৰ্ণ কৰি তুলিছে। অসমীয়া কবি-সাহিত্যিকৰ কলমত পলাশ সদায় প্ৰেম আৰু বিৰহৰ প্ৰতীক। 

এইবাৰো ইয়াৰ ব্যতিক্ৰম হোৱা নাই। লঠঙা গছবোৰে নতুন কুঁহিপাত মেলাৰ আগে আগে এই ফুলবোৰে ধৰিত্ৰীক এক নতুন কইনাৰ সাজত সজাই তুলিছে।

দেশৰ লগতে ৰাজ্যৰ বিভিন্ন প্ৰান্ত যেনে বৰপেটা, বটদ্ৰৱা আৰু মাজুলী ইত্যাদিত আৰম্ভ হৈছে দৌল যাত্ৰাৰ উলাহ। কিয়নো আজি ৰঙৰ উৎসৱ হোলী। আবিৰৰ ৰঙেৰে ৰঙীন হৈ পৰিছে চৌদিশ। ৰঙীন,ফাকুৱা, ফিচকাৰীৰে ভৰপূৰ হৈ পৰিছে ৰাজ্যৰ বজাৰসমূহ ।

বৰদোৱাত এই ৰঙৰ উৎসৱৰ সূচনা কৰি অসমীয়া সাংস্কৃতিক চেতনাত এক নৱ দিশৰ সূচনা কৰে মহাপুৰুষ শ্ৰীমন্ত শংকৰদেৱে। ২১ বছৰ বয়সতে গুৰুজনাই বৰদোৱাত এই উৎসৱ পালন কৰিছিল। 

দ্বিতীয়তে বৈকুণ্ঠপুৰী বৰপেটা ধামত দৌল উৎসৱ প্ৰচলন কৰিছিল বৰপেটা সত্ৰৰ মথুৰা দাস বুঢ়া আতাই। আৰু সেই তেতিয়াৰে পৰা পৰম্পৰাগতভাৱে জাকজমকতাৰে বৰপেটা সত্ৰত দৌল উৎসৱ পালন কৰি অহা হৈছে।আজি কৃষ্ণ বন্দনা আৰু হোলী গীতৰ মূৰ্ছনাৰে মুখৰিত হৈ পৰিছে ৰাজ্যৰ ভিন্ন প্ৰান্ত। সকলোৰে মাজত কেৱল আনন্দৰ বন্যা।