ট্রাম্পৰ বিৰুদ্ধে মহাভিযোগৰ প্ৰস্তাৱ দাখিলৰ সম্ভাৱনা, মার্কিন ৰাষ্ট্ৰপতিক অপসাৰণৰ দাবীত প্ৰতিবাদ

ডিজিটেল ডেস্ক : আমেৰিকাৰ ৰাষ্ট্ৰপতি ড'নাল্ড ট্রাম্পক পদৰ পৰা আঁতৰোৱাৰ দাবীত শনিবাৰে ৰাজধানী ৱাশ্বিংটনত হাজাৰ হাজাৰ লোকে প্রতিবাদ কৰে। 'ৰিম'ভ দ্য ৰিজিম' শীর্ষক প্রতিবাদী সমাৱেশত বৃহৎসংখ্যক লোকে অংশগ্রহণ কৰে। 

তেওঁলোকে ৰাষ্ট্ৰপতি ট্রাম্পৰ বিৰুদ্ধে সংসদত মহাভিযোগৰ প্ৰস্তাৱ উত্থাপন কৰা, বিচাৰ কৰা আৰু অপসাৰণ কৰাৰ দাবী জনায়। বর্তমান ট্রাম্প প্রশাসনৰ কাম-কাজ তথা নীতিক লৈ অসন্তুষ্ট লোকসকলৰ উমৈহতীয় মঞ্চ ৰিমুভেল কোৱালিশ্যনে এই প্রতিবাদী সমাৱেশৰ আহবান জনাইছিল। প্রতিবাদত টেক্সাছৰ সাংসদ অল গ্রীন আৰু আৰক্ষীৰ প্রাক্তন বিষয়া মাইকেল ফেননৰ দৰে ব্যক্তিও উপস্থিত আছিল। আনহাতে, প্রখ্যাত বেণ্ড ড্রপকিক মাফিজ আৰু আৰ্টিষ্ট আর্থ টু ইভে সমাৱেশত প্রতিবাদী গীত পৰিৱেশন কৰে। পাছত তেওঁলোকে প্রতিবাদী সমদলো উলিয়ায়। 

সমাৱেশত উপস্থিত থকা মাইকেল ফেননে কয় যে আমেৰিকাৰ সংখ্যাগৰিষ্ঠ জনসংখ্যাক অৱহেলা কৰাটো সহ্য কৰা নহ'ব। আনহাতে, অল গ্রীনে ঘোষণা কৰে যে বৰদিনৰ আগতে ট্রাম্পৰ বিৰুদ্ধে মহাভিযোগৰ প্ৰস্তাৱ দাখিল কৰা হ'ব। তেওঁ কয় যে আমেৰিকাৰ পৰিৱেশ উন্নত হোৱা নাই, বৰং অধিক বেয়াৰ ফালেহে গৈছে। তেওঁ কয়, 'আমি তেওঁৰ বিৰুদ্ধে মহাভিযোগৰ প্ৰস্তাৱ উত্থাপন কৰিব লাগিব, তেওঁ মহাভিযোগত অভিযুক্ত কৰিব লাগিব আৰু তেওঁক আঁতৰাব লাগিব, যাতে ভবিষ্যতে কোনো একনায়কত্ববাদী নেতাই চৰকাৰ দখলৰ কথা ভাবিব নোৱাৰে।'

উৎসঃ দৈনিক জনমভূমি