জনজাতিকৰণৰ বিৰোধিতাৰে কোকৰাঝাৰত হিংসাত্মক পৰিস্থিতি

ডিজিটেল ডেস্ক : অসম বিধানসভাত ৬ জনগোষ্ঠীৰ জনজাতিকৰণৰ সন্দৰ্ভত মন্ত্ৰীগোটৰ প্ৰতিবেদন দাখিল কৰাৰ প্রাকমুহূর্তত কালি কোকৰাঝাৰত জনজাতীয় ছাত্ৰৰ প্ৰতিবাদে ভয়ংকৰ ৰূপ ধাৰণ কৰে। 

ছয় জনগোষ্ঠীৰ জনজাতিকৰণৰ বিৰুদ্ধাচৰণ কৰি কালি জনজাতীয় ছাত্র সমাজে বি টি চি পৰিষদীয় ভৱনত প্ররেশ কৰি চকী-টেবুল, আচবাব, টিভি ভাঙি লণ্ডভণ্ড কৰে। জনজাতীয় ছাত্র সমাজে বিধান পৰিষদীয় ভৱনত প্ৰৱেশ কৰি এনেদৰে লণ্ডভণ্ড কৰা কাৰ্য ৰাজ্যত এয়াই প্রথম বুলি বিবেচিত হৈছে আৰু এই কার্যই ব্যাপক প্রতিক্ৰিয়াৰ সৃষ্টি কৰিছে। 

উল্লেখযোগ্য যে ৰাজ্যৰ ছয় জনগোষ্ঠীক জনজাতিকৰণ সন্দর্ভত মন্ত্রীগোটে বিধানসভাত প্রতিবেদন দাখিল কৰাৰ পূর্বেই কালি কোকৰাঝাৰত পুনৰ সমদল বাহিৰ কৰা হয়। কোকৰাঝাৰৰ বড়োলেণ্ড বিশ্ববিদ্যালয়ৰ পৰা জনজাতীয় ছাত্র সমাজে ছয় জনগোষ্ঠীৰ জনজাতিকৰণৰ বিৰোধিতাৰে কালি বিয়লি বিশাল প্রতিবাদী সমদল বাহিৰ কৰা হয়। 

উক্ত বিশাল প্রতিবাদী সমদলত হাজাৰ হাজাৰ জনজাতীয় ছাত্র-ছাত্রীয়ে অংশগ্রহণ কৰে। হাতে হাতে বেনাৰ-ফেস্টুন, প্লে'কার্ড লৈ প্রতিবাদী সমদলটোৱে দেৱৰগাঁও হৈ জে ডি পথেৰে বি টি চি সচিবালয় অভিমুখে ৰাওনা হয়। প্রতিবাদী সমদল চলি থকা সময়ত প্রতিবাদকাৰীসকলে হাগ্রামা মহিলাৰী হুঁচিয়াৰ, হাগ্রামা মহিলাৰী গ' বেক, বিশ্বজিত দৈমাৰী মুর্দাবাদ, প্রমোদ বড়ো গ' বেক, অসম চৰকাৰ হায় হায়, হিমন্ত বিশ্ব শৰ্মা মুর্দাবাদ, ৰণোজ পেগু মুর্দাবাদ, ৰৌণগৌড়া নাৰ্জাৰী মুর্দাবাদ, উত্থাও গৌৰা ব্রহ্ম হুঁচিয়াৰ, গ' বেক, চৰণ বড়ো গ' বেক, ৰিহণ দৈমাৰী মুর্দাবাদ, চি চি টি অ' এ জিন্দাবাদ, ট্রাইবেল ঐক্য জিন্দাবাদ, ছয় জনগোষ্ঠীৰ জনজাতিকৰণ বাতিল কৰক, উই বাণ্ট জাষ্টিছ, এন্টি ট্রাইবেল হুঁচিয়াৰ, জৈ বড়ো হাৰিনী জৈ আদি ইত্যাদি শ্ল'গানেৰে পৰিৱেশ উত্তাল কৰি বি টি চি সচিবালয়ৰ পিনে অগ্ৰসৰ হয়। 

প্রায় ৫/৬ কিল'মিটাৰ পথ সমদল কৰি প্ৰতিবাদকাৰীৰ দলটো শান্তিপূর্ণভাবে বি টি চি সচিবালয়ৰ প্ৰৱেশদ্বাৰৰ বাহিৰত উপস্থিত হয়। কিন্তু প্রৱেশদ্বাৰত উপস্থিত হোৱাত প্রতিবাদকাৰী উগ্ৰ হৈ পৰে আৰু নিৰাপত্তাৰক্ষীৰ বাধা নেওচি বলপূর্বকভাৱে প্ৰৱেশদ্বাৰৰ গেট খুলি সচিবালয়ৰ চৌহদত প্ৰৱেশ কৰিবলৈ আৰম্ভ কৰে। প্ৰতিবাদকাৰীসকলে বি টি চি সচিবালয়ৰ প্ৰথম গে'ট পাৰ হোৱাৰ পাছত প্রতিবাদকাৰীসকলে বি টি চি সচিবালয়ৰ দ্বিতীয় গে'টৰ পিনে অগ্ৰসৰ হয়। লগে লগে আৰক্ষী সষ্টম হৈ উঠে যদিও হাজাৰ হাজাৰ প্ৰতিবাদকাৰীয়ে আৰক্ষীৰ বাধা নেওচি বি টি চিৰ দ্বিতীয় গেট বলপূর্বকভাৱে খুলি বি টি চিৰ বিধান পৰিষদ (এচেম্বলি) ভৱনত উপস্থিত হয়। ইয়াৰ পাছতে জনজাতীয় ছাত্র সমাজৰ প্রতিবাদে ভয়ংকৰ ৰূপ ধাৰণ কৰি এফালৰ পৰা মহটিয়াই নিয়ে। বিটি চিৰ হৃদপিণ্ডস্বৰূপ বি টি চি বিধান পৰিষদীয় ভৱনত প্ৰৱেশ কৰি আচবাব, ফুলৰ টাব, লিফফ্টৰ গ্লাছ লণ্ডভণ্ড কৰাৰ লগতে চকী-মেজ ভাঙি-ছিঙি চুৰমাৰ কৰে। 

ইয়াৰ পাছতে প্রতিবাদকাৰীসকলে বি টি চি বিধান পৰিষদীয় সদনৰ এল চি ডি টিভি ভাঙি, সদনৰ গেলাৰীৰ চকী দলিয়াই লণ্ডভণ্ড কৰে। লক্ষণীয় যে জনজাতীয় ছাত্র সমাজে বি টি চি বিধান পৰিষদীয় ভৱন লণ্ডভণ্ড কৰাৰ পাছত পুনৰ সদনৰ সন্মুখত প্ৰতিবাদত নামি পৰে। প্ৰতিবাদকাৰীসকলে প্রতিবাদস্থলীত বি টি চিৰ মুখ্য কাৰ্যবাহী হাগ্রামা মহিলাৰীৰ উপস্থিতি দাবী কৰে আৰু বি টি চিয়ে ছয় জনগোষ্ঠীৰ জনজাতিকৰণত আপত্তি নাই বুলি দিয়া 'এন অ' চি' চি' উঠাই লোৱাৰ দাবী জনায়। 

প্রতিবাদকাৰীসকলে ছয় জনগোষ্ঠীৰ জনজাতিকৰণত ঘোৰ বিৰোধিতা কৰি নিজ দাবীৰ সমর্থনত অটল হৈ প্রতিবাদ অব্যাহত ৰাখে। উত্তপ্ত হৈ থকা পৰিস্থিতি নিয়ন্ত্রণ কৰিবলৈ পৰৱৰ্তী সময়ত আৰক্ষী উচ্চ পদস্থ বিষয়াৰ লগতে অধিক আৰক্ষী বাহিনীও মোতায়েন কৰিব লগা হয়। অৱশেষত প্রতিবাদস্থলীত জিলা আযুক্তা মাচান্দা এম পার্টিন, জিলা আৰক্ষী অধীক্ষক অক্ষত গার্গকে ধৰি উচ্চপদস্থ বিষয়াসকল উপস্থিত হৈ পৰিস্থিতি নিয়ন্ত্ৰণ কৰে। 

জিলা আয়ুক্তই প্রতিবাদী শিক্ষার্থীসকলৰ দাবী সন্দৰ্ভত চৰকাৰক অৱগত কৰা হ'ব বুলি প্রতিবাদকাৰীৰ সৈতে আলোচনাত মিলিত হৈ আশ্বাস প্রদান কৰাত প্রতিবাদী কাৰ্যসূচী স্থগিত ৰাখে। প্রতিবাদী ছাত্ৰ-ছাত্ৰীয়ে কোকৰাঝাৰ জিলাৰ আয়ুক্তা মাছান্দা এম পার্টিনৰ জৰিয়তে অসম চৰকাৰে ছয় জনগোষ্ঠীক জনজাতিকৰণৰ প্ৰস্তাৱ বাতিল কৰাৰ দাবীত অসমৰ মুখ্যমন্ত্ৰী, কেন্দ্ৰীয় চৰকাৰৰ জনজাতি পৰিক্ৰমা আৰু বি টি চি চৰকাৰলৈ স্মাৰক-পত্ৰ প্ৰদান কৰে। 

তদুপৰি বি টি চি চৰকাৰে ছয় জনগোষ্ঠীৰ জনজাতিকৰণত আপত্তি নাই বুলি দিয়া 'এন অ' চি' প্রত্যাহাৰ কৰাৰ বাবে বি টি চিৰ মুখ্য কাৰ্যবাহী হাগ্রামা মহিলাৰীক ২৪ ঘণ্টাৰ সময়সীমা বান্ধি দিয়ে। তদুপৰি প্ৰতিবাদী শিক্ষার্থীসকলৰ ওপৰত কোনো ধৰণৰ এজাহাৰ চৰকাৰ-প্রশাসনে ৰুজু কৰিব নোৱাৰিব বুলি জিলা আযুক্তৰ পৰা আশ্বাস লয় প্রতিবাদকাৰীসকলে। প্রশাসনে প্রতিবাদকাৰীসকলৰ দাবী মানি লোৱাত অৱশেষত প্রতিবাদী কাৰ্যসূচীৰ ফলত উদ্ভৱ হোৱা উত্তপ্ত পৰিস্থিতি শাম কাটে আৰু প্ৰতিবাদকাৰীসকল বি টি চি সচিবালয় তথা বিধান পৰিষদীয় ভৱনৰ চৌহদ ত্যাগ কৰে। ইপিনে, জনজাতীয় ছাত্র সমাজৰ একাংশ নেতাই কয় যে ছয় জনগোষ্ঠীক জনজাতিকৰণ কৰিলে বর্তমানে জনজাতিৰ সুবিধা ভোগ কৰি থকা জনজাতিসকলৰ বিস্তৰ ক্ষতিসাধন হ'ব। 

কোনো কাৰণতে ছয় জনগোষ্ঠীৰ জনজাতিকৰণ মানি লোৱা নহ'ব বুলি মন্তব্য কৰি প্ৰতিবাদকাৰীসকলে চৰকাৰে ভুল সিদ্ধান্ত লোৱাৰ বাবেই আজিৰ পৰিৱেশৰ উদ্ভৱ হৈছে বুলি মন্তব্য কৰে। বি টি চিয়ে ছয় জনগোষ্ঠীৰ জনজাতিকৰণত আপত্তি নাই বুলি কিয় এন অ'চি দিলে তাৰ উত্তৰ লাগে বুলি মন্তব্য কৰি বি টি চিয়ে দিয়া 'এন অ' চি' শীঘ্রেই উঠাই ল'বলৈ দাবী জনাইছে। তদুপৰি জনজাতীয় মন্ত্রী, বিধায়কক বিষয়টো সন্দর্ভত সবল ভূমিকা ল'বলৈ জনজাতীয় ছাত্র সমাজে আহান জনাইছে। উল্লেখযোগ্য যে ছয় জনগোষ্ঠীক জনজাতিকৰণ সন্দর্ভত কেবিনেটে সিদ্ধান্ত লোৱাৰ পাছতে কোকৰাঝাৰত বিগত তিনি দিন ধৰি ধাৰাবাহিকভাবে আন্দোলন আৰম্ভ হৈছিল আৰু ছয় জনগোষ্ঠীৰ জনজাতিকৰণৰ বিৰুদ্ধাচৰণ কৰি কোকৰাঝাৰত প্ৰতিবাদী ধর্ণা-সমদল বাহিৰ হৈছিল। অৱশেষত কালি জনজাতীয় ছাত্র সমাজৰ প্রতিবাদে ভয়ংকৰ ৰূপ ধাৰণ কৰে আৰু বি টি চি বিধান পৰিষদীয় ভৱনত প্ৰৱেশ কৰি লণ্ডভণ্ড কৰে।

উৎসঃ দৈনিক জনমভূমি