ৱেবকাষ্টিং কৰিব দেশৰ সকলো ভোটকেন্দ্রত

ডিজিটেল ডেস্ক : নির্বাচন আয়োগে ভোটদানৰ হাৰ বৃদ্ধি কৰাৰ বাবে নিৰীক্ষণ বৃদ্ধি কৰাৰ পদক্ষেপ আৰম্ভ কৰিছে। ইয়াৰ অধীনত দেশৰ সকলো ভোট গ্রহণ কেন্দ্ৰৰ ৱেবকাষ্টিং কৰিব নির্বাচন আয়োগে।

বিহাৰ বিধানসভাৰ নিৰ্বাচনৰ পৰাই এই প্ৰক্ৰিয়া আৰম্ভ কৰা হ'ব। অৱশ্যে ৱেবকাষ্টিং ডাটা আয়োগে অভ্যন্তৰীণ হিচাপে ব্যৱহাৰ কৰিব আৰু ইয়াক ৰাজহুৱা নকৰে। বৰ্তমান ৫০% ভোট গ্রহণ কেন্দ্রতহে ৱেবকাষ্টিং কৰা হয়। যিবিলাক অঞ্চলত ইণ্টাৰনেটৰ সুবিধা আছে সেইবিলাকতহে ৱেবকাষ্টিং কৰা হ'ব।

বাকী ভোটগ্রহণ কেন্দ্ৰবোৰত ভিডিঅ'গ্রাফিক্স, ফটোগ্রাফীৰ দৰে বিকল্পৰ ব্যৱস্থা থাকিব। আয়োগে প্রদেশ, জিলা আৰু বিধানসভা সমষ্টি পর্যায়ত ৱেবকাষ্টিং মনিটৰিং নিয়ন্ত্রণ কক্ষ স্থাপন কৰিব। ইয়াক তদাৰক তথা নিৰীক্ষণ কৰাৰ বাবে আয়োগে নডেল বিষয়া নিযুক্ত কৰিব।

উৎসঃ দৈনিক জনমভূমি