এম জি এনৰেগাৰ ডাটাবেছৰ পৰা প্ৰায় ২৭ লাখ শ্রমিকৰ নাম কৰ্তন

ডিজিটেল ডেস্ক : এই বছৰৰ ১০ অক্টোবৰৰ পৰা ১৪ নৱেম্বৰৰ ভিতৰত এম জি এনৰেগাৰ ডাটাবেছৰ পৰা প্ৰায় ২৭লাখ শ্রমিকৰ নাম আঁতৰোৱাৰ খবৰত কংগ্ৰেছে চৰকাৰক আক্ৰমণ কৰে। কংগ্ৰেছে কয় যে এয়া বিক্ষিপ্ত ঘটনা নহয়, গ্রাম্য নিয়োগ আঁচনিখন 'প্রণালীবদ্ধভাৱে অন্ত পেলোৱাৰ প্রচেষ্টা।' ইয়াৰ উপৰি বিৰোধী দলটোৱে এম জি এনৰেগাৰ ন্যূনতম পাৰিশ্ৰমিক ৪০০ টকালৈ বৃদ্ধি কৰাৰ দাবীও দোহাৰে।

কংগ্ৰেছৰ যোগাযোগ বিভাগৰ মুৰব্বী, সাধাৰণ সম্পাদক জয়ৰাম ৰমেশে সামাজিক মাধ্যম এক্সত এটা বাতৰিও শ্বেয়াৰ কৰে, য'ত কোৱা হৈছে যে অক্টোবৰৰ ১০ তাৰিখৰ পৰা ১৪ নৱেম্বৰৰ ভিতৰত ১০.৫ লাখ লোকৰ নাম এনৰেগাত অন্তর্ভুক্ত হোৱাৰ বিপৰীতে ২৭.৫ লাখ শ্রমিকৰ নাম কর্তন হৈছে।

ৰমেশে কয়, 'ভাৰতৰ গাঁৱৰ দৰিদ্ৰসকলৰ সংস্থানৰ বিধায়িনী অধিকাৰ নাইকিয়া কৰাৰ আন এক প্রচেষ্টা। যোৱা এমাহত, ১০ অক্টোবৰৰ পৰা ১৪ নৱেম্বৰলৈ এম এনৰেগা হিতাধিকাৰীৰ ডাটাবেছৰ পৰা ২৭ লাখ নাম মোদী চৰকাৰে কৰ্তন কৰিলে। এই হিতাধিকাৰীসকলৰ ৬ লাখ আছিল সক্রিয় শ্রমিক।

তেওঁ আৰু কয় যে হিতাধিকাৰীৰ এই গণ-কৰ্তনৰ ঘটনা শ্ৰমিকৰ বাবে ই-কে ৱাই চি প্ৰক্ৰিয়াৰ বলৱৎকৰণৰ সৈতে সম্পর্ক আছে। তেওঁ আৰু কয় যে চৰকাৰে প্ৰৱৰ্তন কৰা নেশ্যনেল ম'বাইল মনিটৰিং ছিষ্টেম (এন এম এম এছ) আৰু আধাৰ-বে'ছড পেমেন্ট ছিষ্টেমৰ (এ বি পি এছ) বাবে প্রায় ২ কোটি শ্রমিকে কাম আৰু ধন পোৱাৰ অধিকাৰৰ পৰা বঞ্চিত হৈছে।

উৎস: দৈনিক জনমভূমি