ৰাছিয়াই জাৰ্মান, বৃটেইনকে ধৰি ছয়ত্ৰিশখন দেশৰ বিমান নিষিদ্ধ কৰিলে

ডিজিটেল ডেস্কঃ যুদ্ধংদেহী ৰূপত ইউক্ৰেইন আৰু ৰাছিয়াৰ মাজত যুদ্ধ চলি থকাৰ সময়তে ৰাছিয়াই কেইবাখনো দেশৰ বিমানসেৱা নিষিদ্ধ কৰিছে। ৰাছিয়াই ঘোষণা কৰিছে যে তেওঁলোকে ইয়াৰ বিমানৰ ওপৰত কেইবাটাও নিষেধাজ্ঞাৰ প্ৰতিক্ৰিয়া স্বৰূপে ব্ৰিটেইন আৰু জাৰ্মানীকে ধৰি ৩৬খন দেশৰ এয়াৰলাইনৰ দ্বাৰা বিমান চলাচল নিষিদ্ধ কৰিছে। মস্কোৰ পৰা অহা বিবৃতি অনুসৰি ৰাছিয়াৰ বিমান সেৱাসমূহে এতিয়া বেছিভাগ ইউৰোপীয় দেশৰ লগতে কানাডাৰ আকাশসীমাত প্ৰৱেশ কৰিবলৈ অক্ষম হৈছে। নিষিদ্ধ দেশসমূহৰ এয়াৰলাইনসমূহে কেৱল বিশেষ অনুমতিৰ লৈহে ৰাছিয়াৰ আকাশসীমাত প্ৰৱেশ কৰিবলৈ সক্ষম হ'ব। বিগত সপ্তাহত, ব্ৰিটেইনে দেশখনৰ মুখ্য কেৰিয়াৰ এৰোফ্লটৰ লগতে ব্যক্তিগত জেট নিষিদ্ধ কৰাৰ পাছত ৰাছিয়াই ইউৰোপীয়ান সংঘৰ এয়াৰলাইনছ নিষিদ্ধ কৰিছিল। ইউক্ৰেইনৰ ওপৰত চলি থকা আক্ৰমণৰ মাজতে, ইউৰোপীয় ইউনিয়নে দেওবাৰে ঘোষণা কৰে যে তেওঁলোকে ব্যক্তিগত জেটকে ধৰি ৰাছিয়াৰ বিমানৰ বাবে তেওঁলোকৰ আকাশসীমা বন্ধ কৰি দিছে। উল্লেখ্য যে, হাংগেৰিৰ ৰাজধানী বুদাপেষ্টৰ পৰা ইউক্ৰেইনত আৱদ্ধ হৈ থকা ২৪০জন ভাৰতীয় নাগৰিকক কঢ়িয়াই নিয়া ষষ্ঠখন স্থানান্তৰ বিমান সোমবাৰে দিল্লী বিমানবন্দৰত উপস্থিত হৈছে। কেন্দ্ৰীয় মন্ত্ৰী মুখতাৰ আব্বাছ নকভিয়ে তেওঁলোকক আদৰণি জনাই কয় যে, এই সংকটৰ সময়ত ভাৰত চৰকাৰে প্ৰতিজন ভাৰতীয়ক ইয়ালৈ ঘূৰাই অনাৰ বাবে ২৪ঘণ্টা কাম কৰি আছে। আজি বিমানবন্দৰত উপস্থিত হোৱা শিক্ষাৰ্থীসকলে তেওঁলোকক সুৰক্ষিতভাৱে স্থানান্তৰ কৰাৰ বাবে চৰকাৰক ধন্যবাদ জ্ঞাপন কৰে আৰু ইউক্ৰেইনক বাকী ভাৰতীয়সকলক ঘূৰাই আনিবলৈ আহ্বান জনায়।