ডিজিটেল ডেস্কঃ আই পি এলৰ লীগ পৰ্যায়ৰ অন্তিমখন মেচত গুজৰাট টাইটানছৰ বেটছমেন শুবমান গিলে আৰচিবিক এটা দূৰ্দান্ত শতকৰে পৰাস্ত কৰে। ইয়াকে লৈ ক্ষুব্ধ হৈ পৰিছে আৰচিবিৰ কিছু সংখ্যক সমৰ্থক। আনকি তেওঁলোকে শুবমানৰ ভগ্নীৰ ওপৰত আক্ৰমণ কৰা হৈছে। শেহতীয়াকৈ দিল্লী মহিলা আয়োগে ইয়াৰ বিৰুদ্ধে কঠোৰ ব্যৱস্থা গ্ৰহণৰ আশ্বাস দিছে।
ছচিয়েল মিডিয়াত কেইবাজনো লোকে শুবমানৰ ভগ্নীক উদ্দেশ্যি আক্ৰমণ কৰিছিল। এই ঘটনাৰ পিছতে শুবমানৰ পৰিয়ালে দিল্লী কমিছন ফৰ উইমেনত এজাহাৰ দাখিল কৰে। দিল্লী মহিলা আয়োগৰ মুৰব্বী স্বাতী মালিৱালে কয়- ''শুবমানৰ ভগ্নীক হাৰাশাস্তিৰ ঘটনাটো অতি দুখজনক। মাত্ৰ এখন খেলৰ ভিত্তিত কাকো এনেদৰে গুণ্ডাগিৰি কৰিব নোৱাৰি। ইয়াৰ পূৰ্বে বিৰাট কোহলীৰ কণমানি কন্যাকো নিৰ্যাতন চলাইছিল। আমি তেতিয়াও ব্যৱস্থা লৈছিলো। এইবাৰো কৰিম। এনে ঘটনা সহ্য কৰা নহ’ব।”
উল্লেখ্য যে আই পি এলত ১৪খন মেচত ৬৮০ ৰান সংগ্ৰহ কৰিছে শুবমানে। ৰান সংগ্ৰহৰ ক্ষেত্ৰত তেওঁৰ সন্মুখত আছে কেৱল আৰচিবিৰ অধিনায়ক ফাফ ডু প্লেছিছ। ১৪খন মেচত তেওঁ ৭৩০ ৰান সংগ্ৰহ কৰিছে।
Continue Reading
