ডিজিটেল ডেস্কঃ শেহতীয়াকৈ মুক্তি লাভ কৰা ওম ৰাৱটৰ আদিপুৰুষ শীৰ্ষক চলচ্চিত্ৰখনে সমালোচক আৰু দৰ্শকৰ পৰা মিশ্ৰিত সমালোচনাৰ সন্মুখীন হৈছে। ২০২৩ চনৰ আটাইতকৈ প্ৰত্যাশিত মুক্তিৰ অন্যতম এই পৌৰাণিক ছবিখনে যদিও বক্স অফিচত বাম্পাৰ অপেনিং লাভ কৰিছিল, প্ৰভাশ অভিনীত ছবিখনক বহু কাৰণত ট্ৰ’ল কৰা দেখা গৈছে৷ সংলাপ আৰু ভিএফএক্সৰ বাবে ছবিখনক কঠোৰভাৱে সমালোচনা কৰা হৈছে৷
বহু ইণ্টাৰনেট ব্যৱহাৰকাৰীয়ে আদিপুৰুষৰ ‘জলী না’ সংলাপ আপত্তিজনক বুলি বিবেচনা কৰিছে। অৱশ্যে ছবিখনৰ সংলাপসমূহৰ বাবে সহ-লেখক মনোজ মুণ্টাশ্বিৰেও একে কথাৰ পক্ষ লৈছে।
এটা ৰাষ্ট্ৰীয় সংবাদ মাধ্যমৰ সৈতে হোৱা এক সাক্ষাৎকাৰত মনোজ মুন্টাশ্বিৰে কয়, "এয়া কোনো ভুল নহয়। ই এক অতি নিখুঁত চিন্তা প্ৰক্ৰিয়া যিটো বজৰংবলীৰ বাবে আৰু সকলো চৰিত্ৰৰ বাবে সংলাপ লিখাৰ ক্ষেত্ৰত দেখা গৈছে। আমি ইয়াক সহজ কৰি তুলিছো কাৰণ আমি এনে কৰিব লাগিব।এটা কথা বুজিব লাগিব যদি ছবি এখনত একাধিক চৰিত্ৰ থাকে, সকলোৱে একে ভাষা ক'ব নোৱাৰে। ই এক প্ৰকাৰৰ ডাইভাৰচন, এইয়া অতি প্ৰয়োজনীয়৷''
উল্লেখযোগ্য যে ওম ৰাৱটৰ দ্বাৰা পৰিচালিত আদিপুৰুষত প্ৰভাশে ভগৱান ৰামৰ চৰিত্ৰত, কৃতি চেননে দেৱী সীতাৰ চৰিত্ৰত, ছানী সিং লক্ষ্মণৰ চৰিত্ৰত আৰু ছেইফ আলী খানে ৰাৱণৰ চৰিত্ৰত অভিনয় কৰিছে। ছবিখনে ২০২৩ চনৰ ১৬ জুনত চিনেমা হলত মুক্তি লাভ কৰিছিল৷
Continue Reading
