ডিজিটেল ডেস্কঃ সৌৰভ গাংগুলীৰ জীৱনীমূলক ছবিক লৈ চৰ্চা চলি আছে। কোনে ৰূপায়ন কৰিব টীম ইণ্ডিয়াৰ 'দাদা’ৰ চৰিত্ৰত? এই সন্দৰ্ভত বলিউডৰ বহু তাৰকাৰ নাম উচ্চাৰিত হৈ আহিছে। কিন্তু এতিয়াও চূড়ান্ত হোৱা নাই।
বিচিচিআইৰ প্ৰাক্তন সভাপতি গাংগুলী সোমবাৰে কলিকতাৰ পৰা মুম্বাইলৈ উৰা মাৰিছে। পৰিচালক লাভ ৰঞ্জনৰ 'লাভ ফিল্মছ' নামৰ সংস্থাটো ছবিখনৰ প্ৰযোজনা কৰাৰ দায়িত্বত আছে। ছৱিখনৰ চিত্ৰনাট্য শুনিবলৈকে মুম্বাইলৈ উৰা মাৰিছে 'দাদা’।
সৌৰভৰ জীৱনীমূলক ছবিয়ে তেওঁৰ ক্ৰিকেট জীৱনৰ উত্থান-পতনক উপস্থাপন কৰিব। তেওঁৰ জীৱনৰ উত্থান-পতন, বিতৰ্ক, প্ৰত্যাৱৰ্তন – সকলোবোৰ ছবিখনত থাকিব। ছৱিৰ স্ক্ৰিপ্টখনৰ বিষয়ে অতি সাৱধান গাংগুলী। গতিকে যিকোনো বস্তু চূড়ান্ত কৰাৰ আগতে পৰিচালকে স্ক্ৰিপ্টখন গাংগুলীক দেখুৱাই লৈছে। সূত্ৰঅনুসৰি, মঙলবাৰৰ বৈঠকৰ পিছত স্ক্ৰিপ্টখন চূড়ান্ত কৰা হ'ব।
নিজৰ বায়োপিকৰ ওপৰত গাংগুলীয়ে টুইটাৰত এইদৰে লিখিছে- "ক্ৰিকেট মোৰ জীৱন। ই মোক আত্মবিশ্বাস দিছে, আগবাঢ়ি যোৱাৰ সামৰ্থ্য দিছে। এই যাত্ৰাৰ সোৱাদ হৈছে আনন্দ। মোৰ জীৱন ডাঙৰ পৰ্দাত দেখুওৱা হ'ব।''
উল্লেখ্য যে ইতিমধ্যে ভাৰতীয় ক্ৰিকেট দলৰ অধিনায়কসকলৰ ভিতৰত বিতৰ্কিত অধিনায়ক মহম্মদ আজহাৰুদ্দিন আৰু মহেন্দ্ৰ সিং ধোনীৰ বায়’পিক নিৰ্মাণ কৰা হৈছিল।
Continue Reading
