ডিজিটেল ডেস্কঃ ২০২৩ বৰ্ষটো বলীউডৰ কিং শ্বাহৰূখ খানৰ বাবে অতি সফল হিচাপে বিবেচিত হৈছে। চলিত বছৰৰ আৰম্ভণিতে অভিনেতাগৰাকীৰ ছবি ‘পাঠান’ বক্স অফিচত ব্লকবাষ্টাৰ হিচাপে প্ৰমাণিত হয়। শ্বাহৰূখ খানৰ ছবি জৱানো বছৰৰ মাজভাগত মেগা ব্লকবাষ্টাৰ হিচাপে চিহ্নিত হয় আৰু এতিয়া বছৰৰ শেষত মুক্তি পাবলৈ গৈ আছে কিং খানৰ ছবি ‘ডাংকি’। এনে পৰিস্থিতিত ছবিখন মুক্তিৰ কিছুদিন পূৰ্বে শ্বাহৰূখ খান আকৌ এবাৰ মা বৈষ্ণো দেৱীৰ মন্দিৰত সেৱা আগবঢ়াবলৈ উপস্থিত হয়।
শ্বাহৰূখ খানৰ তৃতীয়খন ছবি ‘ডাংকি’ এইবাৰ মুক্তিৰ বাবে সাজু হৈছে। ছবিখন মুক্তিৰ কিছুদিন পূৰ্বে মা বৈষ্ণো দেৱীৰ মন্দিৰত দৰ্শন কৰিবলৈ উপস্থিত হৈছে কিং খান। মঙলবাৰে অৰ্থাৎ আজি পুৱা মাৰ দৰবাৰত কিং খানক দেখা গ’ল। ছ’চিয়েল মিডিয়াত ওলোৱা ভিডিঅ’টোত শ্বাহৰুখ খানে গাঢ় চশমা আৰু একে ৰঙৰ জেকেট পিন্ধি নিজৰ পৰিচয় লুকুৱাই ৰখা দেখা গৈছে।এই সময়ছোৱাত অভিনেতাজনক তেওঁৰ নিৰাপত্তাৰক্ষীয়ে ঘেৰি ৰাখিছিল। নিউজ এজেন্সী পিটিআইয়ে নিজৰ অফিচিয়েল এক্স হেণ্ডেলত ভিডিঅ’টো শ্বেয়াৰ কৰাৰ সময়ত লিখিছে- “আজি বলীউডৰ অভিনেতা শ্বাহৰূখ খানে মা বৈষ্ণো দেৱী মন্দিৰ পৰিদৰ্শন কৰিছিল।”
অহা ২১ ডিচেম্বৰত ছবিগৃহত মুক্তি পাবলৈ গৈ আছে ‘ডাংকি’। এই ছবিখনৰ পৰিচালনা কৰিছে ৰাজকুমাৰ হিৰাণীয়ে। শেহতীয়াকৈ নিৰ্মাতাসকলে ছবিখনৰ পোষ্টাৰ আৰু টিজাৰ মুকলি কৰি অনুৰাগীৰ উত্তেজনা বৃদ্ধি কৰিছে। ছবিখনৰ তাৰকা অভিনেতাৰ কথা ক’বলৈ গ’লে শ্বাহৰূখ খানৰ বাহিৰেও তাপসী পান্নু, বিকি কৌশলকে ধৰি বহু অভিনেতাই ‘ডাংকি’ত গুৰুত্বপূৰ্ণ ভূমিকা পালন কৰিছে। এই ছবিখনে বক্স অফিচত প্ৰভাসৰ ‘ছালাৰ’ৰ সৈতে মুুক্তিলাভ কৰিব। বৰ্তমান সময়ত কিং খানৰ অনুৰাগীসকল আশাবাদী যে ‘ডাংকিয়ে’ ছবিগৃহতো উপাৰ্জনৰ সকলো অভিলেখ ভংগ কৰিব।
Continue Reading
