ৱাহিদা ৰহমান… যাক দেখিলে বলীউডৰ বহু তাৰকাৰ কঁপি উঠিছিল হৃদয় ; আজি দাদা চাহেব ফাল্কে বটাঁৰে সন্মানিত এইগৰাকী স্বপ্নসুন্দৰী

তথ্য আৰু সম্প্ৰচাৰ মন্ত্ৰালয়ে ঘোষণা কৰিছে যে এইবাৰৰ দাদাচাহেব ফাল্কে জীৱনজোৰা সাধনা বঁটা লাভ কৰিব প্ৰবীণ অভিনেতা ৱাহিদা ৰহমানে। মঙলবাৰে তথ্য আৰু সম্প্ৰচাৰ মন্ত্ৰী অনুৰাগ ঠাকুৰে টুইটাৰত এই কথা ঘোষণা কৰে। ঠাকুৰে লিখিছে, “ভাৰতীয় চিনেমালৈ ৱাহিদা ৰহমানৰ অৱদানৰ বাবে এইবাৰ তেওঁলৈ সন্মানীয় দাদাচাহেব ফাল্কে জীৱনজোৰা সাধনা বঁটা প্ৰদান কৰা হৈছে বুলি ঘোষণা কৰি মই এক অপৰিসীম সুখ আৰু সন্মান অনুভৱ কৰিছো।”

তেওঁ লগতে কয়, ‘ৱাহিদা জী-এ হিন্দী ছবিত অভিনয় কৰি সমালোচকৰ প্ৰশংসা লাভ কৰিছে, তাৰ ভিতৰত বিশিষ্ট, প্যাছা, কাগজ কে ফুল, চৌধৰী কা চান্দ, চাহেব বিৱি আৰু গুলাম, গাইড, খামোছি আদি কেইবাখনো ছবি। ৫ দশকৰো অধিক সময়ৰ কেৰিয়াৰত তেওঁ নিজৰ ভূমিকাসমূহ চৰম সূক্ষ্মতাৰে পৰিৱেশন কৰিছে, যাৰ ফলত ৰেচমা এণ্ড শ্বেৰা ছবিখনত কৰা অভিনয়ৰ বাবে ৰাষ্ট্ৰীয় চলচ্চিত্ৰ বঁটা লাভ কৰিছে। পদ্মশ্ৰী আৰু পদ্মভূষণ বঁটা বিজয়ী ৱাহিদা জীয়ে কঠোৰ পৰিশ্ৰমেৰে সৰ্বোচ্চ পৰ্যায়ৰ পেছাদাৰী উৎকৰ্ষতা অৰ্জন কৰিব পৰা এগৰাকী ভাৰতীয় নাৰীৰ নিষ্ঠা, দায়বদ্ধতা আৰু শক্তিৰ উদাহৰণ দাঙি ধৰিছে।”তেওঁ লগতে কয় যে-“যি সময়ত ঐতিহাসিক নাৰী শক্তি বন্দন অধিনিয়ম সংসদে গৃহীত কৰিছে, সেই সময়ত তেওঁক এই আজীৱন কৃতিত্ব বঁটাৰে সন্মানিত কৰাটো ভাৰতীয় চিনেমাৰ এগৰাকী আগশাৰীৰ মহিলা আৰু ছবিৰ পিছত নিজৰ জীৱনটো দান-বৰঙণি আৰু সমাজৰ বৃহত্তৰ মংগলৰ বাবে শুভবাৰ্তা।যাৰ বাবে মই তেওঁক অভিনন্দন জনাইছো৷’

উল্লেখ্য যে ৱাহিদা ৰহমানে তেলেগু ছবি ৰোজুলু মাৰায়ী (১৯৫৫)ৰ জৰিয়তে চলচ্চিত্ৰ জগতত আত্মপ্ৰকাশ কৰে। প্যাছা (১৯৫৭), গাইড (১৯৬৫), খামোশী (১৯৬৯), ফাগুন (১৯৭৩), কভি কভি (১৯৭৬), চান্দনী (১৯৮৯), লামহে (১৯৯১), ৰং দে বসন্তী (২০০৬) আদি বহু ছবিত অভিনয় কৰিছে।