ডিজিটেল ডেস্কঃ পিতৃৰ মৃত্যুৰ পিছত তেওঁ সম্পূৰ্ণৰূপে বিধ্বস্ত হৈ পৰিছিল। কেৱল সেয়াই নহয়, বাৰে বাৰে নিজকে শেষ কৰাৰ চিন্তাই তেওঁক আগুৰি ধৰিছিল। কিন্তু কংগ্ৰেছ নেতা ৰাহুল গান্ধীয়ে তেওঁক সেই ভাৱনাৰ পৰা আঁতৰি আহিবলৈ সহায় কৰিছিল। কানাড়া অভিনেত্ৰী দিব্যা স্পন্দনাই এক সাক্ষাৎকাৰত এনে দাবী কৰে।
সেই কঠিন পৰিস্থিতিৰ পৰা কেনেকৈ ওলাই আহিছিল, সেই সাক্ষাৎকাৰত প্ৰকাশ কৰিছিল লোকসভাৰ প্ৰাক্তন সাংসদ দিব্যাই। কংগ্ৰেছৰ মুখপাত্ৰ স্পন্দনাই কয়, ‘মোৰ পিতৃৰ মৃত্যুৰ দুসপ্তাহৰ পিছতে মই সংসদলৈ গৈছিলো। তেতিয়াও মই শোকৰ মুহূৰ্তটো পাৰ কৰিব পৰা নাছিলো। সংসদত কি চলি আছে মই বুজিব পৰা নাছিলো।"
কংগ্ৰেছৰ প্ৰাক্তন সাংসদগৰাকীয়ে কয় যে পিতৃৰ মৃত্যুৰ শোকে তেওঁক এনেদৰে আগুৰি ধৰিলে যে তেওঁ কামত মনোনিৱেশ কৰিব নোৱাৰিছিল। নিৰ্বাচনতো তেওঁ পৰাজিত হয়। পিতৃৰ মৃত্যু তেওঁৰ বাবে এটা ডাঙৰ আঘাত আছিল, তেওঁৰ নিৰ্বাচনী পৰাজয়ে আৰু অধিক আঘাত কৰিছিল। সেই সময়ত তেওঁ অনুভৱ কৰিছিল যে আত্মহত্যাই একমাত্ৰ উপায়। সেই মুহূৰ্ততে ৰাহুল তেওঁৰ কাষলৈ আহিল। ৰাহুল গান্ধীয়ে তেওঁক মানসিকভাৱে যথেষ্ট সহায় কৰিলে। আত্মহত্যাৰ চিন্তাৰ পৰা আঁতৰাই নিলে।
স্পন্দনাই কয়, "মোৰ জীৱনত আটাইতকৈ ডাঙৰ প্ৰভাৱ মোৰ মা, তাৰ পিছতে মোৰ দেউতা আৰু তৃতীয়তে ৰাহুল গান্ধী।" কানাড়া অভিনেত্ৰীগৰাকীয়ে দাবী কৰে যে সেইদিনা ৰাহুলে তেওঁৰ কাষত থিয় নোহোৱা হ’লে আজি জীয়াই নাথাকিলেহেঁতেন।
২০১২ চনত যুৱ কংগ্ৰেছত যোগদান কৰিছিল স্পন্দনাই। ২০১৩ চনৰ উপ-নিৰ্বাচনত তেওঁ কৰ্ণাটকৰ মাণ্ড্যাৰ পৰা জয়লাভ কৰি সাংসদ হৈছিল। কংগ্ৰেছৰ ছ’চিয়েল মিডিয়া চেলৰ মুৰব্বী আছিল স্পন্দনা। পিছত সেই পদৰ পৰা পদত্যাগ কৰে। কানাড়া অভিনেত্ৰীগৰাকীয়েও যোৱা বছৰ অভিনয়লৈ ঘূৰি অহাৰ কথা ঘোষণা কৰিছিল।
Continue Reading
