ডিজিটেল ডেস্ক: ৰাহুল গান্ধীৰ ফ্লায়িং কিছ প্ৰসংগক লৈ বুধবাৰে ব্যস্ত হৈ পৰিল বিজেপি৷ বিশেষকৈ স্মৃতি ইৰাণীয়ে প্ৰসংগটো তুলি ধৰাৰ পাছত ইজনৰ পাছত সিজন নেতাই সমালোচনাৰ লক্ষ্য কৰি ল’লে ৰাহুল গান্ধীক৷
ৰাহুল গান্ধীয়ে উত্থাপন কৰা মণিপুৰৰ প্ৰসংগৰ পৰা জনদৃষ্টি আঁতৰাই ৰাখিবলৈ বিজেপিয়ে ফ্লায়িং কিছ প্ৰসংগ অৱতাৰণা কৰাৰ অভিযোগ উঠিছে৷
অৱশ্যে, বিজেপি সাংসদ হেমা মালিনীয়ে ফালৰি কাটিছে বিষয়টোৰ পৰা৷ মালিনীয়ে ৰাহুল গান্ধীক সংসদত ফ্লায়িং কিছ কৰা দেখা নাই বুলি মন্তব্য কৰিছে৷
হেমা মালিনীৰ মন্তব্যই খুব কম সময়ৰ ভিতৰতে টুইটাৰৰ ভাইৰেল ভিডিঅ’ অফ-দ্য-ডে’ত প্ৰৱেশ কৰিছিল৷ আনকি এই বিষয়টোক কেন্দ্ৰ কৰি বিজেপিয়ে ৰাহুল গান্ধীৰ ওপৰত তীব্ৰ আক্ৰমণ চলাইছিল৷
ৰাহুল গান্ধীয়ে ফ্লায়িং কিছ কৰিছিল নেকি বুলি সোধাত হেমা মালিনীয়ে কয়, মই সেইটো দেখা নাছিলোঁ৷ কিন্তু তেওঁ কিছুমান শব্দ কৈছিল, যিবোৰ খুব শুদ্ধ নাছিল৷
কংগ্ৰেছ নেতা ৰাহুল গান্ধীয়ে বুধবাৰে সংসদত তেওঁৰ প্ৰথম ভাষণৰ পাছত সংসদৰ পৰা বিদায় লোৱাৰ সময়ত বিজেপি সাংসদক উদ্দেশ্যি ফ্লায়িং কিছ দিয়াৰ অভিযোগ উঠিছিল। অভিযোগ অনুসৰি কেন্দ্ৰীয় মন্ত্ৰী স্মৃতি ইৰাণীয়ে ভাষণ দি থকা অৱস্থাত সংসদ ভৱনৰ পৰা ওলাই অহাৰ সময়তে ৰাহুলে দিছিল ফ্লায়িং কিছ৷
Continue Reading
