ডিজিটেল ডেস্কঃ ট্ৰেফিক নিয়ম উলংঘা কৰি জৰিমনা ভৰাৰ অভিজ্ঞতা হয়তো প্ৰায় সকলোৰে আছে৷ ট্ৰেফিক নিয়ম উলংঘা কৰা স্বত্বেও নেতাই জৰিমনা ভৰা কেতিয়াবা আপুনি দেখিছেনে? প্ৰজাৰ ক্ষেত্ৰত প্ৰযোজ্য হোৱা নিয়মবোৰ ৰজাৰ ক্ষেত্ৰত লঘু হৈ পৰা দেখা যায়৷ কিন্তু ব্যতিক্ৰম হ’ল ব্ৰিটেইন৷
যান-বাহন নিয়ম উলংঘা কৰাৰ বাবে এইবাৰ ব্ৰিটেইনৰ আটাইতকৈ শক্তিশালী ব্যক্তিজন অৰ্থাৎ প্ৰধানমন্ত্ৰীয়েই ভৰিব লগীয়া হ’ল জৰিমনা৷ প্ৰধানমন্ত্ৰী ঋষি ছুনাকে চলন্ত বাহনত বহি ছচিয়েল মিডিয়াৰ বাবে ভিডিঅ’ বনোৱাৰ সময়ত ছীটবেল্ট। ব্যৱহাৰ কৰা নাছিল৷ এইবাবেই যান-বাহন আৰক্ষীৰ ৰোষত পৰিল প্ৰধানমন্ত্ৰীগৰাকী৷
অৱশ্যে , প্ৰধানমন্ত্ৰীগৰাকীয়ে নিজৰ ভুল স্বীকাৰ কৰিছে৷ লগতে তেওঁ স্পষ্টকৈ কৈছে যে , এয়া তেওঁৰ ভুল আছিল। লগতে প্ৰধানমন্ত্ৰীগৰাকীয়ে এই কাৰ্যৰ বাবে ক্ষমাও বিচাৰে৷
ব্ৰিটেইনত ছীটবেল্ট ব্যৱহাৰ নকৰিলে এজন যাত্ৰীয়ে ১০০ পাউণ্ডৰ জৰিমনা ভৰিব লাগিব। আনহাতে এই গোচৰ আদালতৰ মজিয়া পায় তেন্তে এই জৰিমনাৰ পৰিমাণ ৫০০ পাউণ্ডলৈ বৃদ্ধি হ’ব পাৰে।
ব্ৰিটেইনৰ প্ৰধানমন্ত্ৰীগৰাকীয়ে এক যাত্ৰাৰ সময়ত গাড়ীৰ ভিতৰত ছচিয়েল মিডিয়াৰ বাবে ভিডিঅ’ প্ৰস্তুত কৰিছিল। গাড়ীৰ পিছৰ ছীটত বহি ভিডিঅ’ প্ৰস্তুত কৰাৰ সময়ত ব্ৰিটেইনৰ প্ৰধানমন্ত্ৰীগৰাকীয়ে লগোৱা নাছিল ছীটবেল্ট।
উল্লেখযোগ্য যে, ছুনাকৰ ওপৰত এইয়াই প্ৰথম জৰিমনা নহয়৷ ইয়াৰ পূৰ্বেও বিগত বৰ্ষত তেওঁ তৎকালীন প্ৰধানমন্ত্ৰী বৰিছ জনছনৰ সৈতে কোভিড লকডাউনৰ নিয়ম ভংগ কৰিছিল। এতিয়া আইন ৰক্ষকেই এনেদৰে আইন ভংগ কৰি বাতৰিৰ শিৰোনামা দখল কৰাৰ লগতে কিছু সমালোচনাৰো সন্মুখীন হৈছে প্ৰধানমন্ত্ৰী৷
Continue Reading
