ডিজিটেল ডেস্কঃ বৰ্তমানৰ আই পি এলত বিৰাট কোহলীয়ে এই পৰ্যন্ত ৬৩৪ ৰান সংগ্ৰহ কৰিছে। সৰ্বাধিক ৰান সংগ্ৰহৰ বাবে তেওঁ কমলা ৰঙৰ টুপিৰ মালিক। কিন্তু তাৰ পিছতো কোহলীৰ ষ্ট্ৰাইক ৰেটৰ ওপৰত প্ৰশ্ন উত্থাপন হৈছে। এইবাৰ তেওঁৰ বন্ধু এ বি ডি ভিলিয়েৰ্ছে এই বিষয়ে মন্তব্য কৰিছে।
ছ’চিয়েল মিডিয়াত এটা ভিডিঅ’যোগে ডি ভিলিয়াৰ্ছে এই কথা মুকলিকৈ কয়। তেওঁ কয়, ‘বিৰাটৰ ষ্ট্ৰাইক ৰেটক লৈ প্ৰশ্ন উত্থাপন হৈছে। এইবোৰ মোৰ বিৰক্তি লাগিছে। গতিকে মই আৰু মৌন হৈ থাকিব নোৱাৰিলোঁ।’’
কিছুদিন পূৰ্বে বিৰাটে নিজেই কৈছিল যে খেলপথাৰৰ বাহিৰত বহি কোনোবাই কি কয় তাক গুৰুত্ব নিদিয়ে। তেওঁ কেৱল নিজৰ খেলতহে গুৰুত্ব দিয়ে। সমালোচকসকলৰ ক্ৰিকেটৰ জ্ঞানক লৈও প্ৰশ্ন উত্থাপন কৰে ডি ভিলিয়াৰ্ছে।
দক্ষিণ আফ্ৰিকাৰ প্ৰাক্তন ক্ৰিকেটাৰগৰাকীয়ে কয়, ‘যেতিয়া ক্ৰিকেটৰ বিষয়ে একো নজনা লোকে বিৰাটৰ দৰে কাৰোবাক সমালোচনা কৰে তেতিয়া মই আচৰিত হওঁ। তেওঁৰ ষ্ট্ৰাইক ৰেটৰ ওপৰত প্ৰশ্ন উত্থাপন কৰাসকলক সুধিব বিচাৰিছো, আপুনি কিমান মেচ খেলিছে? আই পি এলত কিমান শতক আছে? প্ৰথমে খেলপথাৰলৈ আহক, তেতিয়া বুজিব হেঁচাত ৰান কৰাটো কিমান কঠিন। বিৰাটে বছৰ বছৰ ধৰি তেনেকুৱা কৰি আহিছে।”
আই পি এলত দীৰ্ঘদিন ধৰি ৰয়েল চেলেঞ্জাৰছ বেংগালুৰুৰ হৈ একেলগে খেলিছিল এই যুটিয়ে। খেলপথাৰৰ বাহিৰতো তেওঁলোকৰ বন্ধুত্ব ভাল।
Continue Reading
