ডিজিটেল ডেস্কঃ সোণৰ চামুচ মুখত লৈ জন্ম হোৱা নাছিল তেওঁৰ। কিন্ত যিদৰে বোকাতহে পদুম ফুলে , ঠিক তেনেদৰেই দুখ-দাৰিদ্ৰৰে ভৰা এটা পৰিয়ালৰ পৰাই উজলি উঠিছে উত্তৰ প্ৰদেশৰ ক্ৰিকেটাৰ ৰিংকু। আইপিএলৰ এখন শেহতীয়া খেলত গুজৰাট টাইটানছৰ বিৰুদ্ধে কলকাতা নাইট ৰাইডাৰ্ছে যি অকল্পনীয় বিজয় সাৱস্ত্য কৰিবলৈ সক্ষম হৈছে তাৰ আঁৰৰ ব্যক্তি জনেই হৈছে ৰিংকু। 
বিজয়ৰ বাবে কলকাতা নাইট ৰাইডাৰ্ছক প্ৰয়োজন হৈছিল ২৯ ৰানৰ, হাতত আছিল মাত্ৰ ছটা বল। সেই ছটা বলৰেই পাঁচটাই ছিক্স কোবাই ৰিংকুৱে ৩১ ৰান কৰিবলৈ সক্ষম হ’ল। ফলত অকল্পনীয়ভাবে বিজয়ৰ সোৱাদ লাভ কৰিলে কলকাতা নাইট ৰাইডাৰ্ছে। লগে লগে দেশৰ ক্ৰিকেট ইতিহাসত নাম খোদিত হ’ল ৰিংকুৰ। উল্লেখ ইয়াৰ আগতে ২০ অভাৰৰ খেলত কোনো খেলুৱৈয়েই এনেদৰে একেৰাহে পাঁটটা বলত ছিক্সাৰ কোবোৱা নাছিল। আইপিএলৰো ইতিহাসত ৰিংকুৰ নাম সোণালী আখৰেৰে খোদিত হৈ ৰ’ব। 
বিজয়ৰ এনে অকল্পনীয় ঘটনাৰে নায়ক হৈ পৰা ৰিংকু সিঙৰ ঘৰ উত্তৰ প্ৰদেশৰ আলিগড়ত। এটা দুখীয়া পৰিয়ালৰ সন্তান ৰিংকু। সৰুৰে পৰাই কেৱল অভাৱৰ সৈতে সহাৱস্থান কৰা ৰিংকুৱে পিছে নিজকে অভাৱে গ্ৰাস কৰিবলৈ দিয়া নাছিল। অভাৱক প্ৰত্যাহ্বান হিচাবে লৈ আগুৱাই গৈছিল ৰিংকু।
ৰিংকুৰ পিতৃয়ে লোকৰ ঘৰে ঘৰে গেছ চিলিণ্ডাৰ বিতৰণ কৰি পৰিয়ালটো পোহপাল দি আহিছে। ক্ৰিকেটৰ প্ৰতি ধাউতি থকা ৰিংকুৱে বহু পৰিশ্ৰমৰ অন্তত উত্তৰ প্ৰদেশৰ অনুৰ্ধ-১৯ দলৰ এজন খেলুৱৈ হিচাপে খেলাৰ সুবিধা পাইছিল। খেলৰ লগতে আজৰি পালেই তেওঁ লোকৰ ঘৰত কাম-বন কৰিও দুপইচা উলিয়াইছিল। নিজৰ জীৱন সংগ্ৰামৰ কথা মনত ৰাখিয়েই ৰিংকুৱে তেওঁৰ সাফল্যক সকলো সংগ্ৰামী লোকৰ বাবে উচৰ্গা কৰিছে।
Continue Reading
