ডিজিটেল ডেস্কঃ এইবাৰ আই পি এলত ভাল খেলা কেইজনমান ক্ৰিকেটাৰৰ ভিতৰত বৰুণ চক্ৰৱৰ্তী অন্যতম। কলকাতা নাইট ৰাইডাৰ্ছৰ অন্যতম বলাৰ হিচাপে পৰিগণিত হৈছে মিষ্টেৰী স্পিনাৰগৰাকী। ১১খন মেচত ১৭টা উইকেট দখল কৰিছে বৰুণে। বৰুণে এইবাৰ আই পি এলত নতুনধৰণেৰে বলিং কৰিছে, যিটো তেওঁ আগতে কৰা নাছিল।
২০২১ চনৰ আই পি এলত কে কে আৰৰ হৈ সোঁহতীয়া স্পিনাৰগৰাকীয়ে ভাল বলিং কৰি ভাৰতীয় দলৰ বাবে দুৱাৰ মুকলি কৰিছিল। সেইবাৰ বৰুণে দুই প্ৰকাৰৰ বল কৰিছিল। এটা হৈছে কেৰম বল। তিনিটা আঙুলি- তৰ্জনী, মধ্যম আৰু অনামিকা আঙুলি ব্যৱহাৰ কৰি এই কেৰম বল কৰা হয়। এই ধৰণৰ বলৰ কোনো স্পিন নাথাকে। কেৰম ষ্ট্ৰাইকাৰৰ দৰেই বেটছমেনৰ ওচৰলৈ বলটো নিক্ষেপ কৰা হয়। এই বলৰ গতি আন বলৰ তুলনাত অলপ বেছি। বলটো উইকেটত অৱতৰণ কৰি পোনে পোনে যায়। ফলত বেটছমেনজন বিপদত পৰে।
বৰুণে ব্যৱহাৰ কৰা দ্বিতীয়টো অস্ত্ৰ আছিল গুগলী। অৰ্থাৎ লেগ স্পিনাৰৰ বলটো পিটছত পৰাৰ পিছত লেগ স্পিন হোৱাৰ সলনি বিপৰীত দিশত ঘূৰে। বৰুণে বেছিভাগ বলেই কেৰম বলিং কৰে। গুগলী আছিল তেওঁৰ অন্যতম অস্ত্ৰ।
কিন্তু এইবাৰ আই পি এলত তেওঁ লেগ স্পিন কৰিবলৈও আৰম্ভ কৰিছে। বলটো সোঁহাতৰ বেটছমেনৰ বাহিৰলৈ আৰু বাওঁহাতৰ বেটছমেনৰ ভিতৰলৈ সোমাইছে। কিন্তু যিহেতু তেওঁৰ বলিং একচনত বিশেষ পৰিৱৰ্তন হোৱা নাই, সেয়েহে বেটছমেনসকলে ইয়াক বুজাত অসুবিধা হৈছে। পঞ্জাৱৰ মেচখনত লিয়াম লিভিংষ্টনে বৰুণৰ লেগ স্পিন বুজিব নোৱাৰি ভুল লাইনত আউট হয়।
আনহাতে হায়দৰাবাদক কেকেআৰৰ বিৰুদ্ধে এখন খেলত অন্তিম অভাৰত জয়ী হ’বলৈ ৯ ৰানৰ প্ৰয়োজন হৈছিল। সেই অভাৰত বেছিভাগ বল লেগ স্পিন কৰিছিল বৰুণে। হায়দৰাবাদৰ আব্দুল ছামাদ ডাঙৰ ডাঙৰ শ্বট খেলি থাকোঁতে বল ভালদৰে মাৰিব নোৱাৰাৰ বাবে আউট হৈছিল। পৰৱৰ্তী বেটছমেনেও বলটো মিছ কৰিলে। বৰুণে এই নতুন অস্ত্ৰটো খুব ভালকৈ ব্যৱহাৰ কৰি আছে। ইয়াৰ ফলাফলো লাভ কৰিছে।
Continue Reading
