ডিজিটেল ডেস্কঃ আৰিয়ান খানৰ ড্ৰাগছ কাণ্ডৰ অনুসন্ধানকালত হোৱা বহুকেইটা আঁসোৱাহৰ তথ্য লাভ কৰিছে নাৰ্ক’টিক কণ্ট্ৰল ব্যুৰো, চমুকৈ এনচিবিয়ে। বলিউডৰ চুপাৰষ্টাৰ শ্বাহৰুখ খানৰ পুত্ৰগৰাকীক অনুসন্ধান কৰা সময়ত এনচিবিৰ আঠজনকৈ বিষয়াই ‘সন্দেহজনক আচৰণ’ কৰিছিল।
উল্লেখ্য যে আৰিয়ান খান কাণ্ডক লৈ এনচিবিয়ে ব্যাপক হাৰত লজ্জিত হৈ আহিছে। প্ৰথমে মে’ মাহত আৰিয়ান খানক দোষমুক্ত কৰা হয় আৰু এতিয়া এজেন্সিটোৰ বিষয়াৰ ওপৰতে ‘সন্দেহজনক আচৰণ’ৰ তথ্য লাভ কৰা গৈছে। কোৱা হৈছে যে আৰিয়ান খানৰ ওপৰত কোনো ‘নিৰ্ভৰযোগ্য সাক্ষ্য’ নোহোৱাকৈ তেওঁক দোষী সজোৱা হৈছিল।
মঙলবাৰে বিভাগীয় সূত্ৰই প্ৰকাশ কৰামতে, এনচিবিৰ বিষয়াকেইগৰাকীৰ ওপৰত এখন বিশেষ অনুসন্ধান আয়োগ গঠন কৰা হৈছে। আয়োগে এনচিবিৰ দিল্লীস্থিত মুখ্য কাৰ্যালয়ত এই সন্দৰ্ভত এখনি প্ৰতিবেদন দাখিল কৰিছে।
অনুসন্ধানকালত ৬৫জন লোকৰ ভাষ্য লোৱা হৈছে বুলি জানিব পৰা গৈছে। আৰিয়ান খানক ধন দাবী কৰাৰ গুৰুত্বপূৰ্ণ অভিযোগো ইয়াত সন্নিৱিষ্ট হৈছে।
উল্লেখযোগ্য যে আৰিয়ান খানকে ধৰি ২০গৰাকী লোকক যোৱা বৰ্ষৰ অক্টোবৰ মাহত মুম্বাইৰ এখন ক্ৰুইজ জাহাজৰ পৰা ড্ৰাগছ লোৱাৰ অভিযোগত গ্ৰেপ্তাৰ কৰা হৈছিল। কাৰাগাৰত তিনি সপ্তাহ কটোৱাৰ পাছত তেওঁ জামিন লাভ কৰে।
Continue Reading
