ডিজিটেল ডেস্কঃ এটা দমকল আৰু দমকলটোত পানী নোলায়। পানীৰ সলনি উলায় আহে মদ! হয়তো মদ্যপায়ীসকলৰ বাবে সুন্দৰ সপোন যেন লাগিব পাৰে কিন্তু এনেধৰণৰেই এটা আজৱ কাণ্ড সংঘটিত হৈছে মধ্যপ্ৰদেশত।
ৰাজ্যখনৰ গুনা নামৰ অঞ্চলটোত পোৱা গৈছে এটা দমকল। দমকলটো পাম্পিং কৰিলেই পানীৰ সলনি মদ উলাই আহে।
অঞ্চলটোত অবৈধ মদৰ বিৰুদ্ধে আবকাৰী বিভাগে এটা অভিযান চলাইছিল। অভিযানকালত মাটিৰ ৭ ফুট তলৰ পাইপত অবৈধ মদ লুকুৱাই ৰখা পোৱা গ’ল। তাৰ ওপৰতে আছে দমকল। অৰ্থাৎ দমকলটো পাম্প কৰিলেই মদখিনি ওলাই আহে। ইতিমধ্যে আৰক্ষীয়ে দমকলটো আৰু মদখিনি জব্দ কৰিছে।
আৰক্ষীয়ে ইতিমধ্যে এই সংক্ৰান্তত আঠজন লোকক চিহ্নিত কৰিছে। কিন্তু কোনো অভিযুক্তক আটক কৰিব পৰা হোৱা নাই। জানিব পৰা মতে, অঞ্চলটোৰ প্ৰায় প্ৰতিটো পৰিয়ালেই এই অবৈধ মদৰ ব্যৱসায়ৰ স’তে জড়িত। কাষৰ হাবিত এই অবৈধ মদসমূহ লুকুৱাই ৰখা হয়। আনকি আৰক্ষী আহিলে মদৰ ব্যৱসায়ৰ স’তে জড়িত থকা লোকসকল সেই হাবিতে গৈ আত্মগোপন কৰি থাকে।
উল্লেখযোগ্য যে মধ্যপ্ৰদেশৰ শিৱৰাজ চৌহান নেতৃত্বাধিন চৰকাৰে অবৈধ মদৰ বিৰুদ্ধে শেহতীয়াকৈ কঠোৰ পদক্ষেপ গ্ৰহণ কৰি আহিছে। সেই অনুসৰি ৰাজ্যখনৰ কেইবাটাও অঞ্চলত এনেধৰণৰ অবৈধ মদৰ ঘাটি উৎখাট কৰিছে।
Continue Reading
