ডিজিটেল ডেস্কঃ চৌদি আৰৱ দলৰ মুখ্য প্ৰশিক্ষক হাৰ্ভ ৰেনাৰ্ডে আৰ্জেণ্টিনাৰ বিৰুদ্ধে বিশ্বকাপত বৃহৎ বিজয়ৰ পিছত দেশখনৰ ৰাজপৰিয়ালে গোটেই দলটোক ৰোলছ ৰয়েছ উপহাৰ দিব বুলি ওলোৱা খবৰ অস্বীকাৰ কৰিছে।
এইবুলি খবৰ বিয়পি পৰিছিল যে চৌদি আৰৱৰ ৰাজকুমাৰ মহম্মদ বিন ছলমান আল চাউদে কাটাৰৰ পৰা উভতি অহাৰ পিছতে চৌদি আৰৱৰ দলটোৰ প্ৰতিজন খেলুৱৈক আৰএম ৬ মিলিয়ন ৰোলছ ৰয়েছ ফেণ্টম উপহাৰ দিব। অৱশ্যে শেহতীয়াকৈ ৰেনাৰ্ডে এই খবৰ ভুৱা বুলি উল্লেখ কৰি স্পষ্ট কৰি দিছে যে এই বিষয়ে প্ৰচাৰিত খবৰ সঁচা নহয়।
চৌদি আৰৱ দলৰ মুখ্য প্ৰশিক্ষক হাৰ্ভ ৰেনাৰ্ডে কয়, "আমাৰ এটা অতি গুৰুত্বপূৰ্ণ ফেডাৰেচন আৰু ক্ৰীড়া মন্ত্ৰালয় আছে আৰু এই মুহূৰ্তত কিবা এটা পোৱাৰ সময় নহয়। আমি কেৱল এখন খেলহে খেলিছো, গ্ৰুপ পৰ্যায়ৰ দুখন অতি গুৰুত্বপূৰ্ণ খেল এতিয়াও খেলিবলৈ আছেই। গতিকে এতিয়াই আমি ইমান বেছি একো আশা নকৰাই ভাল। দুয়ো খন খেলতে জিকিব পাৰিম বুলি আমি আশা কৰি আছোঁ।"
তেওঁ লগতে কয় "মই নাজানো , উপহাৰৰ কথা কিদৰে ওলাইছে।আৰ্জেণ্টিনাৰ সৈতে হোৱা খেল খনৰ আগতে অনুষ্ঠিত সংবাদমেলখন মই তেনে কোনো কথা কোৱা নাছিলো। মই কৈছিলো যে আৰ্জেণ্টিনাৰ খেলখন আমি খেলিবলগীয়া তিনিখন গুৰুত্বপূৰ্ণ খেলৰ ভিতৰৰে এখন "।
আৰ্জেণ্টিনাৰ বিৰুদ্ধে প্ৰথমটো গ'ল কৰা চৌদি আৰৱৰ ফৰৱাৰ্ড চালেহ আল-শ্বেহৰিয়েও খবৰটো মিছা বুলি অভিহিত কৰিছে। তেওঁ কয় "খবৰটো সঁচা নহয়। আমি ইয়াত আমাৰ দেশৰ সেৱা কৰিবলৈ আৰু আমাৰ সৰ্বশ্ৰেষ্ঠ ফলাফল লাভ কৰিবলৈ আহিছোঁ। এয়াই আমাৰ বাবে পুৰস্কাৰ।"
উল্লেখ্য প্ৰথমে এজন পাকিস্তানী দন্ত চিকিৎসকে ছ'চিয়েল মিডিয়াৰ পোষ্টত চৌদি দলটোৱে বিলাসী গাড়ীখন লাভ কৰিব বুলি প্ৰচাৰ চলাইছিল।
ইফালে, আৰ্জেণ্টিনাৰ বিৰুদ্ধে চৌদি আৰৱৰ ঐতিহাসিক বিজয়ৰ পিছত দেশখনে উদযাপনৰ আয়োজন কৰিছে।অৱশ্যে, চৌদি আৰৱৰ দলটো শনিবাৰে পোলেণ্ডৰ হাতত ২-০ গ'লৰ ব্যৱচ্ছেদত পৰাস্ত হয়।এতিয়া, মেক্সিকোৰ বিৰুদ্ধে দেশখনৰ অন্তিম খন গ্ৰুপ পৰ্যায়ৰ খেল বুধবাৰে অনুষ্ঠিত হ'ব।
Continue Reading
