ডিজিটেল ডেস্কঃ কাটাৰ বিশ্বকাপত শ্ৰেষ্ঠ গ’লৰক্ষক হ’ল আৰ্জেণ্টিনাৰ এমিলিয়ানো মাৰ্টনেজ। বিশ্বকাপৰ গ’ল্ডেন গ্ল’ভছ লাভ কৰিছে তেওঁ। কিন্তু সফলতাৰ সমান্তৰালভাৱে বিতৰ্কতো সাঙোৰ খাই পৰিছে তাৰকাগৰাকী।
এই বিতৰ্কৰ কাৰণ হৈছে গ’ল্ডেন গ্ল’ভছ বঁটা গ্ৰহণ কৰিবলৈ যাওঁতে মঞ্চত কৰা এক বিশেষ ভংগীমা। কেইবাখনো দেশৰ শীৰ্ষ নেতৃত্ব, ফিফাৰ সভাপতি আৰু কোটি কোটি ফুটবলপ্ৰেমীসকলৰ সমুখতে তেওঁ এই ভংগীমা প্ৰদৰ্শন কৰে।
হাতৰ সোণৰ গ্লাভছ তেওঁ যৌনাংগৰ কাষত লৈ প্ৰদৰ্শন কৰে, মুখত উদ্ধত অভিব্যক্তি। অনেকে তেওঁৰ এই ভংগীমাটোক অশ্লীল আখ্যা দিছে। কিন্তু নিজৰ আচৰণক অশ্লীল বুলি ভবা নাই গ’লৰক্ষকগৰাকীয়ে।
“ফৰাচী ফুটবলাৰসকলে মোক কটুক্তি কৰিছিল। সেইকাৰণেই এনেধৰণে উত্তৰ দিছিলো। মই মোৰ নিজৰ ভাৱমূৰ্তিৰ বিষয়ে নাভাবো।”- শেহতীয়া এটা সাক্ষাৎকাৰত তেওঁ এইদৰে কয়।
“আমি বহুত কষ্ট কৰিছো জিকিছো। ফাইনেলৰ আৰম্ভণিত ভাবিছিলো যে মেচখন আমাৰ হাতত। কিন্তু পাছলৈ অত্যন্ত জটিল হৈ পৰিছিল।”- মাৰ্টিনেজে কয়।
“সৰুৰে পৰা বিশ্বকাপ জিকাৰ সপোন দেখি আহিছিলো। এই আনন্দ প্ৰকাশ কৰাৰ কোনো ভাষা নাই।”- তেওঁ কয়।
অনেকে মাৰ্টিনেজৰ আচৰণক অশ্লীল আখ্যা দিলেও ফিফাই এতিয়ালৈকে কোনো প্ৰতিক্ৰিয়া প্ৰকাশ কৰা নাই।
Continue Reading
