ডিজিটেল ডেস্কঃ আজি ঘোষণা কৰা হ’ব ৰাজ্যৰ ৫ বিধানসভা সমষ্টিত অনুষ্ঠিত হোৱা উপ-নিৰ্বাচনৰ ফলাফল। পুৱা ৮ বজাৰ পৰা আৰম্ভ হৈছে ভোটগণনা। গঢ়ি তোলা হৈছে কটকটীয়া নিৰাপত্তা। পুৱা ৮ বজাৰ পৰা প’ষ্টেল বেলটৰে আৰম্ভ হোৱা ভোটগণনাৰ ফলাফললৈ আশাৰে বাট চাই আছে ৰাজ্যবাসীয়ে।
যোৱা ১৩ নৱেম্বৰত ৰাজ্যৰ পাঁচ সমষ্টি ক্ৰমে চামগুৰি, বিহালী, চিদলী, বঙাইগাঁও আৰু ধলাইত উপ-নিৰ্বাচন অনুষ্ঠিত হৈছিল। আজিৰ এই ভোট গণনাত ফলাফল ওলাব মুঠ ৩৪ গৰাকীৰ ভাগ্য৷ কিয়নো এই উপ-নিৰ্বাচনত ৩৪ গৰাকী প্ৰাৰ্থীয়ে প্ৰতিদ্বন্দ্বিতা কৰিছে আৰু ইয়াৰ মাজৰে পৰা দিছপুৰলৈ জয়ী হৈ যাব মাত্ৰ পাঁচ গৰাকী প্ৰাৰ্থী৷
যোৱা ১৩ নৱেম্বৰত অনুষ্ঠিত হৈ যোৱা এই উপ-নিৰ্বাচনত পাঁচটা সমষ্টিত মুঠ ৬৯০১০৬ গৰাকী ভোটাৰে ভোটদান সম্পন্ন কৰে।উপ-নিৰ্বাচনত পাঁচটা সমষ্টিত মুঠ ৩৮ গৰাকী প্ৰাৰ্থী প্ৰতিদ্বন্দ্বিতাত অৱতীৰ্ণ হৈছে। ইয়াৰ ভিতৰত চামগুৰিত সৰ্বাধিক ১১ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে। আনহাতে বঙাইগাঁও সমষ্টিত ৮ গৰাকী প্ৰাৰ্থী, বিহালীত ৪ গৰাকী প্ৰাৰ্থী, ধলাই সমষ্টিত ৮ গৰাকী প্ৰাৰ্থী আৰু ছিদলীত ৩ গৰাকী প্ৰাৰ্থীয়ে প্ৰতিদ্বন্দ্বিতা কৰিছে।
মূলতঃ বিজেপি-অগপ মিত্ৰজোঁট আৰু বিৰোধী কংগ্ৰেছৰ মাজতে হ’ব এই নিৰ্বাচনী যুঁজ। ভোটগ্ৰহণৰ পিছতে দুয়োপক্ষই আটাইকেইটা সমষ্টিত জয়ী হ’ব বুলি দাবী কৰি আহিছে। গতিকে উপ-নিৰ্বাচনৰ এই ফলাফল স্বাভাৱিকতেই হ’ব লক্ষ্যণীয়।
বঙাইগাঁও সমষ্টিৰ ভোটগণনা হৈছে বঙাইগাঁও সদৰত৷ এইবাৰ বঙাইগাঁৱত ভোটদানৰ হাৰ আছিল ৭৭.৮৯%৷ বঙাইগাঁৱত মূল যুঁজ অগপ প্ৰাৰ্থী দীপ্তিময়ী চৌধুৰী আৰু কংগ্ৰেছৰ ব্ৰজেনজিৎ সিনহাৰ মাজতে হোৱাতো নিশ্চিত৷
চিদলী সমষ্টিৰ ভোটগণনা হৈছে কাজলগাঁৱত৷ এইবাৰ উপ-নিৰ্বাচনত চিদলীত ভোটদানৰ হাৰ আছিল ৭৫.৪৭%৷ চিদলীত মূল ভোট যুদ্ধ হ’ব UPPLৰ প্ৰাৰ্থী নিৰ্মল কুমাৰ ব্ৰক্ষ্ম আৰু BPFৰ প্ৰাৰ্থী শুদ্ধ কুমাৰ বসুমতাৰীৰ মাজত৷
বিহালী সমষ্টিৰ ভোট গগণা হৈছে বিশ্বনাথত৷ বিহালীত ভোটদানৰ হাৰ আছিল ৭৫.৭৯%৷ বিহালীত মূল ভোট যুদ্ধ হ’ব বিজেপিৰ দিগন্ত ঘাটোৱাল আৰু কংগ্ৰেছৰ জয়ন্ত বৰাৰ মাজত৷
চামগুৰিৰ ভোটগণনা হৈছে নগাঁও সদৰত৷ এইবাৰৰ উপ-নিৰ্বাচনত চামগুৰিত ভোটদানৰ হাৰ আছিল ৭৯.৫৫%। চামগুৰিত মূল ভোট যুঁজ হ’ব বিজেপিৰ প্ৰাৰ্থী দিপ্লুৰঞ্জন শৰ্মা আৰু কংগ্ৰেছ প্ৰাৰ্থী তানজিল হুছেইনৰ মাজত৷
ধলাই সমষ্টিৰ ভোটগণনা হৈছে শিলচৰত৷ এইবাৰ ধলাই সমষ্টিৰ উপ-নিৰ্বাচনত ভোটদানৰ হাৰ আছিল ৭০.৩১%৷ ধলাই সমষ্টিটো মূল ভোট যুদ্ধ হ’ব প্ৰাৰ্থী বিজেপিৰ নীহাৰ ৰঞ্জন দাস আৰু কংগ্ৰেছৰ ধ্ৰুৱজ্যোতি পুৰুকায়স্থৰ মাজত৷
চিদলী, বঙাইগাঁও, বিহালী, চামগুৰি আৰু ধলাইৰ পৰা কোনগৰাকী প্ৰাৰ্থীয়ে বিজয়ৰ মুকুট পিন্ধি দিছপুৰলৈ যাব সেয়া হব লক্ষ্যণীয়।
Continue Reading
