ডিজিটেল ডেস্ক
যোগাযোগৰ সৰ্বশ্ৰেষ্ঠ মাধ্যম হিচাপে ডাক সেৱাই জনসংযোগ স্থাপন কৰাই নহয়, বহু লোকৰ এক আৱেগিক সম্পৰ্ক আছে ডাক ব্যৱস্থাৰ লগত৷ যোগাযোগ ব্যৱস্থাৰ আজিৰ দৰে উন্নতি সাধন নহওঁতে ডাক সেৱাই সংযোগ কৰিছিল গাঁৱৰ সৈতে চহৰ, চহৰৰ সৈতে ৰাজ্য,আৰু দেশৰ সৈতে বিদেশক৷
ডাকোৱালজন আছিল সকলোৰে ঈশ্বৰৰ দৰে৷ নঙলামুখত ডাকোৱাললৈ অপেক্ষা কৰি চকু বিষাইছিল বহুতৰ৷ আকৌ ডাকোৱালজনক দেখাৰ লগে লগেহে যেন স্বস্তি ঘূৰি আহিছিল৷ এটা প্ৰজন্মৰ ভৰষা স্বৰূপ আছিল এই ডাক ব্যৱস্থাটো৷
আজি বিশ্ব ডাক দিৱস। প্ৰতিবছৰে আজিৰ দিনটোতে বিশ্ব ডাক দিৱস পালন কৰা হয়।
জনসংযোগ অথবা জনজীৱনত ডাক ব্যৱস্থাৰ গুৰুত্বক সোঁৱৰাই এই দিৱসটো পালন কৰা হয়৷
লগতে সামাজিক আৰু অৰ্থনৈতিক ব্যৱস্থাত ডাকসেৱাৰ ভূমিকাও ডাক দিৱসৰ জৰিয়তে বিশ্লেষণ কৰি চোৱা হয়৷
এই বৰ্ষৰ বিশ্ব ডাক দিৱসৰ বিষয়বস্তু হৈছে 'পোষ্ট ফৰ প্লেনেট' অৰ্থাৎ ‘গ্ৰহৰ বাবে ডাক’। ই হৈছে বিশ্বৰ সৰ্ববৃহৎ লজিষ্টিক নেটৱৰ্ক আৰু প্ৰতি বছৰে ১৫০ খনতকৈও অধিক দেশে এই দিনটো বিভিন্ন ধৰণে উদযাপন কৰিছে৷ এই দিৱসটো প্ৰথমবাৰ পালন কৰা হৈছিল ১৮৭৪ চনত চুইজাৰলেণ্ডৰ বাৰ্ণত ইউনিভাৰ্চেল ডাক ইউনিয়ন (ইউপিইউ) প্ৰতিষ্ঠা হোৱাৰ তাৰিখত৷ পৰৱৰ্তী সময়ত ১৯৪৮ চনত ইউ পি ইউ ৰাষ্ট্ৰসংঘৰ অংশ হৈ পৰে আৰু দেশসমূহে ১৯৬৯ চনৰ ৯ অক্টোবৰত জাপানৰ টকিঅ'ত ইউপিইউ কংগ্ৰেছত প্ৰথম বিশ্ব ডাক দিৱস উদযাপন কৰে।
ইন্টাৰনেট সেৱা সুলভ হৈ পৰাৰে পৰা যোগাযোগ ব্যৱস্থা যথেষ্ট উন্নত হৈছে৷ চিঠিৰ ব্যৱহাৰ কমিছে৷ কিন্তু ব্যৱহাৰ কমিলেও কমা নাই চিঠিৰ প্ৰতি থকা মানুহৰ আৱেগ৷ তদুপৰি সময় সলনিৰ লগে লগে ডাক ব্যৱস্থাও বহু উন্নত হৈছে৷ বহু উন্নত সা-সুবিধা সংযোজন কৰা হৈছে৷
Continue Reading
