ভাৰত-পাকিস্তানৰ দ্বিপাক্ষিক খেল নহ'ব, আন্তঃৰাষ্ট্ৰীয় প্রতিযোগিতাত নতুন নীতি ঘোষণা ক্রীড়া মন্ত্ৰ্যালয়ৰ

ডিজিটেল ডেস্ক : এছিয়া কাপত পাকিস্তানৰ বিৰুদ্ধে ভাৰতে খেলাটো বৃহস্পতিবাৰে নিশ্চিত হ'ল। উল্লেখযোগ্য যে পহলগামৰ সন্ত্রাসবাদীৰ আক্ৰমণৰ পাছত পাকিস্তানৰ সৈতে সকলো সম্পর্ক ছেদ হোৱাৰ পাছত বিভিন্ন পক্ষই এছিয়া কাপত ভাৰতৰ পাকিস্তানৰ বিৰুদ্ধে মেচ বৰ্জন কৰিবলৈ দাবী জনাই আহিছে।

ইয়াৰ মাজতে বৃহস্পতিবাৰে ক্রীড়া মন্ত্রালয়ে এই কথা স্পষ্ট কৰি দিয়ে যে এছিয়া কাপত ভাৰতে পাকিস্তানৰ বিৰুদ্ধে খেলিব।

ক্রীড়া মন্ত্র্যালয়ে কয় যে ভাৰতে পাকিস্তানৰ বিৰুদ্ধে কোনো ধৰণৰ দ্বিপাক্ষিক ক্রীড়া প্রতিযোগিতা নেখেলে, কিন্তু অহা মাহত কেইবাটাও দলে অংশ গ্রহণ কৰিবলগীয়া এছিয়া কাপত ভাৰতীয় দলক পাকিস্তানৰ বিৰুদ্ধে খেলাত বাধা দিয়া নহয়। মন্ত্র্যালয়ে ভাৰতৰ আন্তঃৰাষ্ট্ৰীয় প্রতিযোগিতাসমূহৰ সম্পর্কত এক নতুন নীতি বৃহস্পতিবাৰে প্রকাশ কৰে।

পাকিস্তানৰ প্ৰতি বিশেষভাৱে গুৰুত্ব দি এই নীতি প্রস্তুত কৰা হৈছে। সূত্ৰসমূহে প্ৰকাশ কৰা অনুসৰি এই নীতি তৎক্ষণাৎ কার্যকৰী কৰা হৈছে। মন্ত্র্যালয়ে এই নীতিৰ প্ৰসংগত কয়, 'পাকিস্তানৰ সৈতে জড়িত ক্রীড়া প্রতিযোগিতাৰ প্ৰতি ভাৰতৰ দৃষ্টিভংগীয়ে দেশখনৰ সৈতে মোকাবিলা কৰাৰ সামগ্রিক নীতিক প্রতিফলিত কৰিছে।'

পৰস্পৰৰ মাজত দ্বিপাক্ষিক ক্রীড়া প্রতিযোগিতাৰ সম্পৰ্কত ইয়াত কোৱা হৈছে যে ভাৰতীয় দলে পাকিস্তানত আয়োজন কৰা প্ৰতিযোগিতাসমূহত অংশ গ্রহণ নকৰে আৰু ভাৰতেও পাকিস্তানৰ দলক ভাৰতত খেলাৰ অনুমতি নিদিয়ে। অৱশ্যে কেইবাখনো দেশে অংশ গ্রহণ কৰা প্ৰতিযোগিতাৰ ক্ষেত্ৰত ই কোনো প্রভাৱ নেপেলায়। ক্রীড়া মন্ত্ৰ্যালয়ৰ সূত্ৰই কয়, 'আমি ভাৰতীয় ক্রিকেট দলক এছিয়া কাপত খেলাত বাধা নিদিওঁ কিয়নো ই এখন বহুপক্ষীয় প্রতিযোগিতা। সূত্ৰটোৱে লগতে কয়, 'আমি ভাৰতীয় দলক কেইবাখনো দেশে অংশ গ্রহণ কৰা প্ৰতিযোগিতাত খেলাত বাধা নিদিওঁ কিয়নো আমি অলিম্পিক চনদ মানি চলিম।'

উৎসঃ দৈনিক জনমভূমি