হিন্দুৰ ভাৱাবেগত আঘাট! পদত্যাগ কৰিলে দিল্লীৰ মন্ত্ৰী ৰাজেন্দ্ৰ পাল গৌতমে

ডিজিটেল ডেস্কঃ তীব্ৰ বিতৰ্কৰ অন্তত পদত্যাগ কৰিছে দিল্লীৰ অৰবিন্দ কেজৰিৱাল কেবিনেটৰ সামাজিক কল্যাণ মন্ত্ৰী ৰাজেন্দ্ৰ পাল গৌতমে। যোৱা সপ্তাহত এটা ধৰ্মান্তৰকৰণ অনুষ্ঠানত উপস্থিত থকাৰ পাছতে বিজেপিৰ ফালৰ পৰা তীব্ৰ সমালোচিত হৈছিল মন্ত্ৰীগৰাকী। অৱশেষত দেওবাৰে তেওঁ পদত্যাগ কৰে।

পদত্যাগ পত্ৰত তেওঁ লিখে যে এনেধৰণৰ ধৰ্মান্তৰকৰণ অনুষ্ঠানসমূহ দেশৰ কোটি কোটি জনতাৰ মাজত চলি আহিছে। কিন্তু এতিয়া বিজেপিয়ে ইয়াক এটা ইচ্যু কৰি লৈছে। বিজেপিয়ে তেওঁ আৰু তেওঁৰ দলক উপহাস কৰা বুলিও মন্ত্ৰীগৰাকীয়ে ক্ষোভ ব্যক্ত কৰে।

উল্লেখযোগ্য যে দিল্লীৰ ঝাণ্ডেৱালানৰ আম্বেদকাৰ ভৱনত অশোকা বিজয় দশমীত মন্ত্ৰীগৰাকী উপস্থিত আছিল। বুদ্ধিষ্ট চ’চাইটি অৱ ইণ্ডিয়া আৰু মিছন জয় ভীম নামৰ দুটা সামাজিক গোটে আয়োজন কৰা উক্ত বছৰেকীয়া অনুষ্ঠানতে ১০,০০০ লোকে হিন্দু লোকে বুদ্ধ ধৰ্ম আঁকোৱালি লয়। এই ধৰ্মান্তৰকৰণ অনুষ্ঠানটোত মন্ত্ৰীগৰাকী উপস্থিত থকাৰ উপৰিও শপত লোৱাও দেখা যায়।

ইয়াৰ পাছতে বিজেপিয়ে অভিযোগ কৰিছিল যে আম আদমী পাৰ্টিয়ে ইয়াৰ হিন্দুৰ ভাৱাবেগক আঘাট হানিছে। সেইবাবে মন্ত্ৰীগৰাকীক কেবিনেটৰ পৰা বাদ দিবলৈ দাবী উত্থাপন কৰিছিল। কেৱল সেয়াই নহয়, দিল্লী বিজেপিৰ এগৰাকী নেতাই মন্ত্ৰীগৰাকীৰ বিৰুদ্ধে দিল্লী আৰক্ষীৰো কাষ চাপিছিল।