ডিজিটেল ডেস্কঃ আই চি চি চেম্পিয়নছ ট্ৰফীৰ ফাইনেলত আজি ডুবাইত ভাৰত আৰু নিউজিলেণ্ডে প্রতিদ্বন্দ্বিতা কৰিব। ফাইনেল মেচখনত জুৱাৰ বজাৰত প্ৰায় ৫ হাজাৰ কোটি টকাৰ বাজি ধৰা হৈছে। ভাৰতীয় নিৰাপত্তা সংস্থাসমূহে এই আশংকা প্রকাশ কৰিছে।
এই মেচখনত আন্তঃৰাষ্ট্ৰীয় জুৱাৰীৰ ফেভাৰিট টীম হ'ল ভাৰত। নিৰাপত্তা সংস্থাসমূহে প্রকাশ কৰা অনুসৰি কুখ্যাত ডি-কোম্পানীকে ধৰি সমগ্র বিশ্বৰে আগশাৰীৰ জুৱাৰীয়ে এই মেচখনত চকু ৰাখিছে। এই কথা জনাৰ পাছত নিৰাপত্তা বাহিনীসমূহ সতর্ক হৈ পৰিছে। নিৰাপত্তা সংস্থাসমূহৰ শীৰ্ষ বিষয়াসকলে প্ৰকাশ কৰা অনুসৰি ডুবাইত অনুষ্ঠিত হোৱা আগশাৰীৰ প্রতিখন ক্রিকেট প্রতিযোগিতাতে দেশ আৰু বিদেশৰ জুৱাৰীসকল মহানগৰখনত উপস্থিত হয়।
সূত্রসমূহে প্রকাশ কৰা অনুসৰি ভাৰতৰ মষ্ট ৱান্টেড কুখ্যাত অপৰাধী ডাউদ ইব্রাহীমেও (ডি-কোম্পানী) এই মেচখনত প্রত্যক্ষভাৱে দৃষ্টি ৰাখিছে। ভাৰতৰ দিল্লীৰ লগতে ভাৰতৰ আৰক্ষীয়ে বিচাৰি ফুৰা কেইবাজনো জুৱাৰীয়েও ক্রিকেটক লৈ জুৱাৰ এখন বিশাল নেটৱৰ্ক চলাই আছে। উল্লেখযোগ্য যে প্রতিযোগিতাখন চলি থকাৰ সময়তে দিল্লীৰ পৰা ৫জন জুৱাৰীক গ্ৰেপ্তাৰ কৰা হয়।
আৰক্ষীৰ জেৰাত এই জুৱাৰীকেইজনে দিয়া স্বীকাৰোক্তিৰ পৰা জানিব পৰা মতে, ক্রিকেটক লৈ হাজাৰ হাজাৰ কোটি টকাৰ জুৱাৰ বজাৰ চলি আছে। এই জুৱাৰ বজাৰবোৰৰ মূল ঘাটি হ'ল ডুবাই। ভাৰত আৰু অষ্ট্ৰেলিয়াৰ মাজৰ প্ৰতিযোগিতাৰ ছেমি ফাইনেল মেচখন চলি থকাৰ সময়তে দিল্লী পুলিচে দুটা জুৱাৰীক গ্ৰেপ্তাৰ কৰে। এই জুৱাৰী দুটাই দিয়া তথ্যৰ পৰা জানিব পৰা মতে, জুৱাৰীৰ দিল্লীৰ পৰা ডুবাইলৈকে সম্পর্ক আছে। গ্ৰেপ্তাৰ কৰা জুৱাৰীকেইটাই প্ৰকাশ কৰা অনুসৰি ক্ৰিকেট খেলক লৈ বাজি ধৰাৰ এই নেটৱৰ্ক ডুবাইৰ পৰা নিয়ন্ত্রিত হয়। এই ৰেকেটৰ মাষ্টাৰ মাইণ্ড ছটো বানছাল নামৰ এটা জুৱাৰীও বুলি জনা গৈছে।
উৎসঃ দৈনিক জনমভূমি
Continue Reading
