আজি মণিপুৰৰ পৰা আৰম্ভ হ’ব ৰাহুল গান্ধীৰ ভাৰত ন্যায় যাত্ৰা, প্ৰশাসনে বান্ধি দিলে কেইবাটাও চৰ্ত

ভাৰত জোড়ো যাত্ৰাই কংগ্ৰেছক শক্তিশালী বিৰোধী দল হিচাপে প্ৰতিষ্ঠা কৰাত যে আটাইতকৈ গুৰুত্বপূৰ্ণ ভূমিকা পালন কৰিলে তাত কোনো সন্দেহ নাই। এই জনসংযোগ অভিযানে ৰাহুল গান্ধীক কংগ্ৰেছৰ নেতা হিচাপেও জনপ্ৰিয়তা আৰু প্ৰাসংগিকতা বৃদ্ধি কৰিলে। সেই জনপ্ৰিয়তাৰ ধাৰাটো বজাই ৰাখিবলৈ পুনৰ আগবাঢ়িছে কংগ্ৰেছ। পুনৰ এইবাৰ ভাৰত ন্যায় যাত্ৰাৰ বাবে সাজু হৈছে ৰাহুল গান্ধী। গোষ্ঠী সংঘাতত অগ্নিগর্ভ হৈ থকা মণিপুৰৰ পৰা কংগ্ৰেছ নেতা ৰাহুল গান্ধীয়ে আৰম্ভ কৰিব ভাৰত ন্যায় যাত্রা। ভাৰত জোড়ো যাত্ৰাৰ পাছত অহা ১৪ জানুৱাৰীৰ পৰা ভাৰত ন্যায় যাত্ৰা আৰম্ভ কৰিব কংগ্ৰেছে। 

ৰাহুল গান্ধীৰ এই যাত্রা অসমতো চলিব । মণিপুৰৰ পৰা নাগালেণ্ড হৈ ৰাহুল গান্ধীৰ এই যাত্রাই ১৭ জানুৱাৰীত অসমৰ আমগুৰিত  প্ৰৱেশ কৰিব ।তাৰ পৰাই প্রথমে উজনি অসমৰ আটাইকেইটা লোকসভা সমষ্টিক স্পর্শ কৰি চলিব এই যাত্ৰা।সত্ৰভূমি মাজুলীৰ লগতে  নৱগঠিত কাজিৰঙা সমষ্টিৰ উপৰি নগাঁও, শোণিতপুৰ  আদি সমষ্টিলৈও  যাব এই যাত্ৰা। তাৰ পৰা লখিমপুৰ সমষ্টি হৈ প্ৰৱেশ কৰিব। পিছত অৰুণাচলত ভাৰত ন্যায় যাত্রা সামৰি পুনৰ অসমত প্ৰৱেশ কৰিব।  নামনি অসম, বৰাক উপত্যকাৰ আটাইকেইটা সমষ্টিকে স্পর্শ কৰিব বুলি জানিব পৰা গৈছে।  উল্লেখ্য কংগ্ৰেছ লোকসভা নিৰ্বাচনত অকলেই ২৯০ টা সমষ্টিত প্ৰতিদ্বন্দিতা কৰিব বিচাৰিছে। আনহাতে ১০০ টা সমষ্টিত ইণ্ডিয়া মিত্ৰজোঁটৰ  সমৰ্থনত প্ৰাৰ্থী প্ৰক্ষেপ কৰিব। যি ২৯০ টা সমষ্টিত অকলেই প্ৰাৰ্থী প্ৰক্ষেপ কৰিব বিচাৰিছে সেই ২৯০ টা সমষ্টিৰ ভিতৰত আছে অসমৰ ১৪ টা সমষ্টিয়েই। সেয়ে এই আটাইকেইটা সমষ্টিকে যে ভাৰত ন্যায় যাত্ৰাই স্পৰ্শ কৰিব সেয়া এক প্ৰকাৰে নিশ্চিত।