ডিজিটেল ডেস্কঃ আজি ভাৰতৰ আটাইতকৈ ধনী উদ্যোগপতি মুকেশ আম্বানীৰ জন্মদিন। বিশ্ব দৰবাৰত ভাৰতৰ সুকীয়া পৰিচয় দাঙি ধৰিবলৈ সক্ষম হোৱা আম্বানীৰ ১৯৫৭ চনৰ ১৯ এপ্ৰিলত য়েমেনৰ এডেনত মুকেশ ধীৰুভাই আম্বানীৰ জন্ম হৈছিল ।মুকেশ আম্বানীৰ পিতৃ ধীৰুভাই আৰু মাতৃ কোকিলাবেন আম্বানী। তেওঁৰ দুগৰাকী ভগ্নী আছে, নীনা ভদ্ৰশ্যাম কোঠাৰী আৰু দিপ্তি দত্তৰাজ চালগাওকাৰ। লগতে আছে ভায়েক অনিল আম্বানী।মুকেশ আম্বানীৰ জন্ম য়েমেনত হৈছিল আৰু ১৯৫৮ চনত তেওঁৰ দেউতাক ধীৰুভাই আম্বানী ভাৰতলৈ উভতি অহাৰ পিছত মচলাৰ ব্যৱসায় আৰম্ভ কৰিছিল।
মুকেশ আম্বানীয়ে ১৯৭০ ৰ দশকলৈকে মুম্বাইৰ ভুলেশ্বৰত এটা দুটা কোঠাৰ ফ্লেটত বাস কৰিছিল। কিছু দিনৰ পিছত পৰিয়ালটোৰ আৰ্থিক পৰিস্থিতি উন্নত হোৱাৰ লগে লগে মুকেশ আম্বানীৰ দেউতাকে কোলাবাৰ ১৪ মহলা চি ৱিণ্ড এপাৰ্টমেণ্ট ভৱনটো ক্ৰয় কৰে।
মুকেশ আম্বানীয়ে ১৯৮৫ চনত নীতা আম্বানীৰ সৈতে বিবাহপাশত আবদ্ধ হয় । তেওঁলোকৰ দুটি পুত্ৰ সন্তান আছে, অনন্ত আৰু আকাশ আম্বানী আৰু এগৰাকী কন্যা ঈশা আম্বানী। পৰিয়ালটো ২৭ মহলীয়া এণ্টিলিয়া নামৰ বিলাসী বাসস্থানত বাস কৰে। যিটো ঘৰৰ মূল্য প্ৰায় ১ বিলিয়ন আমেৰিকান ডলাৰ। ঘৰটোত তিনিখন হেলিপেড, এটা ব্যক্তিগত চিনেমা থিয়েটাৰ, এটা চুইমিং পুল আৰু এটা ফিটনেছ চেণ্টাৰ আছে। ঘৰটোৰ চোৱা-চিতাৰ বাবে ৬০০ জন লোককো নিযুক্তি দিয়া হৈছে।মুকেশ আম্বানীৰ প্ৰিয় খাদ্য হৈছে ইডলি চম্বৰ, তেওঁৰ প্ৰিয় ৰেষ্টুৰেণ্ট হৈছে মুম্বাইৰ মহীশূৰ কেফে।
মুকেশে তেওঁৰ ভাতৃ অনিল আম্বানীৰ সৈতে মুম্বাইৰ পেড্ডাৰ ৰোডৰ হিল গ্ৰেঞ্জ হাইস্কুলৰ পৰা উচ্চ মাধ্যমিকৰ শিক্ষা সম্পূৰ্ণ কৰে। তেওঁ মুম্বাইৰ ছেইণ্ট জেভিয়াৰ কলেজৰ পৰা উচ্চতৰ মাধ্যমিক শিক্ষা সম্পূৰ্ণ কৰে। তেওঁ ইনষ্টিটিউট অৱ কেমিকেল টেকন'লজীৰ পৰা কেমিকেল ইঞ্জিনিয়াৰিঙত স্নাতক ডিগ্ৰী লাভ কৰিছে। তেওঁ ষ্টেনফৰ্ড বিশ্ববিদ্যালয়ত এমবিএ পাঠ্যক্ৰম কৰিবলৈ আৰম্ভ কৰিছিল ।কিন্তু তেওঁৰ দেউতাকক ৰিলায়েন্স কোম্পানী গঢ়াত সহায় কৰিবলৈ পঢ়া বাদ দিছিল।
১৯৮১ চনত ভাৰতলৈ উভতি অহাৰ পিছত মুকেশ আম্বানীয়ে তেওঁৰ দেউতাকক ৰিলায়েন্স ইণ্ডাষ্ট্ৰিজ লিমিটেডৰ কামত সহায় কৰিবলৈ ধৰে। এই সময়ছোৱাত আম্বানী পৰিয়ালৰ ব্যৱসায় তেল শোধন, পেট্ৰ'কেমিকেল, খুচুৰা আৰু দূৰসংযোগ উদ্যোগলৈ সম্প্ৰসাৰিত হৈছিল। তেওঁলোকৰ সহায়ক কোম্পানী, ৰিলায়েন্স ৰিটেইল লিমিটেড হৈছে ভাৰতৰ সৰ্ববৃহৎ ৰিটেইলাৰ। মুকেশ আম্বানী আই পি এল দল মুম্বাই ইণ্ডিয়ানছৰ গৰাকী আৰু ভাৰতৰ ফুটবল লীগ ইণ্ডিয়ান চুপাৰ লীগৰো গৰাকী।
১৯৮৬ চনত মুকেশ আম্বানীৰ দেউতাক ষ্ট্ৰোকত আক্ৰান্ত হয়। এই সময়তে সকলো দায়িত্ব মুকেশ আম্বানীক পৰিয়ালৰ জ্যেষ্ঠ পুত্ৰ হিচাপে গটাই দিয়া হয়। ২৪ বছৰ বয়সতে আম্বানীক পাটালগাংগা পেট্ৰ'কেমিকেল প্ৰকল্প নিৰ্মাণৰ দায়িত্ব দিয়া হৈছিল।
২০০২ চনৰ ৬ জুলাইত মুকেশৰ দেউতাক দ্বিতীয় বাৰ ষ্ট্ৰোকত আক্ৰান্ত হৈ মৃত্যুবৰণ কৰে। আম্বানী ভাতৃসকলৰ মাজত এই বৰ্ধিত উত্তেজনাৰ বাবেই মাতৃ কোকিলাবেন আম্বানীয়ে কোম্পানীটোক দুটা ভাগত বিভক্ত কৰি বিবাদ সমাধান কৰিছিল। মুকেশ আম্বানীয়ে ৰিলায়েন্স ইণ্ডাষ্ট্ৰিজ লিমিটেড আৰু ইণ্ডিয়ান পেট্ৰ'কেমিকেলচ কৰ্পোৰেচন লিমিটেড লাভ কৰিছিল।
মুকেশ আম্বানীৰ নিৰ্দেশনাত, কোম্পানীটোৱে ভাৰতৰ জামনগৰত বিশ্বৰ সৰ্ববৃহৎ পেট্ৰ'লিয়াম শোধনাগাৰ নিৰ্মাণ কৰিছে।
ডিচেম্বৰ ২০১৩ ত মুকেশ আম্বানীয়ে ভাৰতত ৪জি নেটৱৰ্কৰ বাবে ডিজিটেল আন্তঃগাঁথনি স্থাপন কৰিবলৈ ভাৰতী এয়াৰটেলৰ সৈতে এক সহযোগিতামূলক উদ্যোগৰ কথা ঘোষণা কৰে। ১৮ জুন, ২০১৪ তাৰিখে তেওঁ পৰৱৰ্তী তিনি বছৰত ব্যৱসায়ত ১.৮ ট্ৰিলিয়ন টকা বিনিয়োগৰ কথা ঘোষণা কৰে আৰু ২৭ ডিচেম্বৰ, ২০১৫ তাৰিখে আভ্যন্তৰীণভাৱে ৪জি ব্ৰডবেণ্ড সেৱা আৰম্ভ কৰে।
২০১৬ চনত, জিঅ'ই 'এলৱাইএফ' নামৰ ব্ৰেণ্ডৰ অধীনত নিজৰ ৪জি স্মাৰ্টফোন মুকলি কৰে। স্মাৰ্টফোনটো সেই বছৰ ভাৰতৰ তৃতীয় সৰ্বাধিক বিক্ৰী হোৱা স্মাৰ্টফোন আছিল। সেই বছৰৰ ছেপ্টেম্বৰত, জিঅ' ৪জি বাণিজ্যিকভাৱে মুকলি কৰা হৈছিল।
মুকেশ আম্বানীক ফৰ্বছ আলোচনীয়ে এক দশকধৰি ভাৰতৰ আটাইতকৈ ধনী ব্যক্তি হিচাপে ধাৰাবাহিকভাৱে তালিকাভুক্ত কৰি আহিছে। ইয়াৰ উপৰি তেওঁ ফৰ্বৰ বিশ্বৰ আটাইতকৈ শক্তিশালী লোকৰ তালিকাত স্থান পোৱা ভাৰতৰ একমাত্ৰ ব্যৱসায়ী। জানুৱাৰী ২০১৮-ত, তেওঁক ফৰ্বেৰ দ্বাৰা বিশ্বৰ আটাইতকৈ ধনী ব্যক্তিৰ তালিকাত ১৮ সংখ্যক স্থান দিয়া হৈছিল। ২০১৮ চনত তেওঁ চীনৰ জেক মাক অতিক্ৰম কৰে আৰু ৪৪.৩ বিলিয়ন ডলাৰৰ মুঠ সম্পত্তিৰ সৈতে এছিয়াৰ আটাইতকৈ ধনী ব্যক্তি হয়।
Continue Reading
