'বিজেপিৰ লুকুৱাবলগীয়া বা ভয় কৰিবলগীয়া একো নাই': আদানি বিতৰ্কৰ বিষয়ত মুখ খুলিলে অমিত শ্বাহে

উল্লেখ্য আদানি গোটৰ  বিৰুদ্ধে শ্বেয়াৰৰ মূল্য বৃদ্ধি কৰিবলৈ বিত্তীয় প্ৰৱঞ্চনা আৰু তথ্যৰ হেৰফেৰ কৰাৰ অভিযোগ উত্থাপিত হৈছে। আমেৰিকাৰ বিনিয়োগ গৱেষণা সংস্থা হিণ্ডেনবাৰ্গ ৰিচাৰ্ছৰ প্ৰতিবেদন ৰাজহুৱা হোৱাৰ  লগে লগে দেশখনত এক হুলস্থূলৰ সৃষ্টি হৈছে। প্ৰধানমন্ত্ৰী নৰেন্দ্ৰ মোদীৰ উদ্যোগপতি গৌতম আদানিৰ সৈতে "সুসম্পৰ্ক" থকা বুলি কংগ্ৰেছকে ধৰি বিৰোধীয়ে মন্তব্য কৰি আহিছে। আদানিৰ সৈতে মোদীৰ সম্পৰ্ক কি? ৰাহুল গান্ধীয়েও এই সন্দৰ্ভত প্ৰশ্ন উত্থাপন কৰিছে। যুটীয়া সংসদীয় সমিতিয়ে (জেপিচি) গঠন কৰি বিৰোধীয়ে আদানিকাণ্ডৰ  তদন্ত বিচাৰিছে । প্ৰধানমন্ত্ৰী  নৰেন্দ্ৰ মোদীয়ে যোৱা সপ্তাহত সংসদৰ দুয়োখন সদনত ভাষণ দিছিল। অৱশ্যে প্ৰধানমন্ত্ৰীয়ে আদানিৰ বিষয়ত এটা  শব্দও কোৱা নাছিল। অৱশ্যে মোদীয়ে বিৰোধীৰ আক্ৰমণৰ প্ৰতিক্ৰিয়া ব্যক্ত কৰি কৈছিল, "বিৰোধীয়ে বোকা নিক্ষেপ কৰিছে । আপোনালোকে যিমানে বোকা নিক্ষেপ কৰিব, পদুম সিমানেই ফুলিব। "

এনে সময়তে  শ্বাহে কয়, "বিষয়টো উচ্চতম ন্যায়ালয়ৰ বিচাৰাধীন। যিহেতু গোচৰটো শীৰ্ষ আদালতত বিচাৰাধীন হৈ আছে, এজন মন্ত্ৰী হিচাপে এই সন্দৰ্ভত মন্তব্য দিয়াটো উচিত নহ'ব।" শ্বাহে লগতে কয়, "কিন্তু বিজেপিৰ লুকুৱাবলৈ একো নাই। একো ভয়ো নাই।" শ্বাহৰ আগতে কেন্দ্ৰীয় বিত্ত মন্ত্ৰী নিৰ্মলা সীতাৰমণেও এই বিতৰ্কত প্ৰশ্নৰ সন্মুখীন হৈছিল। অৱশ্যে তেওঁ কৌশলেৰে  বিষয়টো এৰাই চলিছিল। তেওঁ মাত্ৰ কৈছিল, "এই  দেশৰ নিয়ামক সংস্থাসমূহ গোটেই বিষয়টোৰ বিষয়ে অৱগত। কেৱল এতিয়াই নহয়, তেওঁলোক সদায় সতৰ্ক। "আদানি কাণ্ড সন্দৰ্ভত  উচ্চতম ন্যায়ালয়ৰ হস্তক্ষেপ বিচাৰি এখন আবেদন দাখিল কৰা হৈছে। শনিবাৰে আৱেদনখনৰ শুনানিৰ সময়ত মুখ্য ন্যায়াধীশ চন্দ্ৰচূড়ে কৈছিল, " আমি নীতিগত বিষয়ত হস্তক্ষেপ কৰিব নিবিচাৰো। এয়া চৰকাৰৰ কাম।" কিন্তু একে সময়তে তেওঁ কয়, "আমি বিশেষজ্ঞ সমিতি গঠনৰ পৰামৰ্শ দিছো। চৰকাৰেও ইয়াত আগ্ৰহী হোৱা প্ৰয়োজন। "