ৰাজ্যৰ সৰ্বত্ৰে ছিণ্ডিকেটৰাজ: ছিণ্ডিকেট কাণ্ডাৰীৰে ৰাজনৈতিক নেতাৰ হলিগলিক লৈ ব্যাপক চৰ্চা

ডিজিটেল ডেস্ক: ৰাজ্যত এতিয়াও অব্যাহত আছে ছিণ্ডিকেট৷ নতুন চৰকাৰ গঠন কৰিয়ে ৰাজ্যত ছিণ্ডিকেটৰাজ বন্ধ কৰা হ’ব বুলি ঘোষণা কৰিছিল মুখ্যমন্ত্ৰী ড° হিমন্ত বিশ্ব শৰ্মাই৷ কিন্তু, মুখ্যমন্ত্ৰীৰ ঘোষণাক অসাৰ প্ৰতিপন্ন কৰি ছিণ্ডিকেট মাফিয়াই চলাই গৈছে ছিণ্ডিকেটৰাজ৷ গৰু, কয়লা, সাৰ, চুপাৰি, কণী, চোৰাং কাঠ ইত্যাদি ছিণ্ডিকেটে ছানি ধৰিছে অসম৷ অন্ধকাৰ জগতত সংগোপন চলি আছে ছিণ্ডিকেটৰ সাম্ৰাজ্যখন৷ মুখ্যমন্ত্ৰীয়ে ছিণ্ডিকেট বন্ধ কৰিব বুলি কৰা ঘোষণাক চৰম ভ্ৰুকুটি কৰি ছিণ্ডিকেট মাফিয়াৰ দপদপনিয়ে টোপনি হৰিছে ৰাজ্যবাসীৰ৷ অলপতে কাছাৰত ছিণ্ডিকেট চক্ৰৰ পৰা প্ৰশাসনে জব্দ কৰিছে ইউৰিয়া সাৰৰ এক বৃহৎ ভাণ্ডাৰ৷ ইউৰিয়া সাৰৰ বৃহৎ ছিণ্ডিকেট চলি আছে বৰাকত৷ তাৰ পৰাই নিয়ন্ত্ৰণ হৈ আছে সাৰ ছিণ্ডিকেট৷ একেদৰে, গোলকগঞ্জতো জব্দ হৈছিল কয়লাৰ ট্ৰাক৷ কয়লাৰ এক বৃহৎ ছিণ্ডিকেট চলি আছে ৰাজ্যত৷ তিনিচুকীয়া জিলাতো কয়লাৰ উৎস বিচাৰি নিগনিৰ গাঁতত ছিণ্ডিকেট মাফিয়াই খনন চলোৱাৰ তথ্য পোহৰলৈ আহিছিল৷ কাৰ্বি আংলঙতো ছিণ্ডিকেট চক্ৰৰ পৰা জব্দ কৰা হৈছিল চোৰাং কাঠ৷ সংৰক্ষিত বনাঞ্চল ধ্বংস কৰি ছিণ্ডিকেট মাফিয়াই চলাই গৈছে কাঠৰ ছিণ্ডিকেট৷ উল্লেখযোগ্য যে, ৰাজ্যত গোপনে চলি থকা এই ছিণ্ডিকেটৰাজৰ ৯০ শতাংশৰ তথ্যহে পোহৰলৈ আহিছে৷ বাকী ১০ শতাংশই এতিয়াও গোপনে চলাই গৈছে ছিণ্ডিকেটৰ ক’লা বেহা৷ ইতিমধ্যে, গ্ৰেপ্তাৰ হোৱা অথবা অভিযুক্ত প্ৰায়সংখ্যক ছিণ্ডিকেট মাফিয়াৰে অসমৰ শাসকীয় দলৰ সৈতে ঘনিষ্ঠতা থকাৰ তথ্যও পোহৰলৈ আহিছে৷ শাসকীয় দল আৰু চৰকাৰৰ প্ৰায়সংখ্যক নেতা-মন্ত্ৰীৰেই ছিণ্ডিকেট মাফিয়াৰে মধুৰ সম্পৰ্কৰ বিষয়ে ইতিমধ্যে সামাজিক মাধ্যমত চৰ্চা চলিছে৷ তাৰ মাজতেই আমাৰ হাতত আহি পৰিছে কেইখনমান বিস্ফোৰক আলোকচিত্ৰ৷ ৭ ফেব্ৰুৱাৰীৰ নিশা নতুন দিল্লীত জনৈক মজুমদাৰ উপাধিৰ এগৰাকী চুপাৰি ছিণ্ডিকেটৰ মাফিয়াই এক নৈশভোজৰ আয়োজন কৰিছিল৷ য’ত শাসক দলৰ কেইবাগৰাকীও বিয়োগোম নেতাই অংশগ্ৰহণ কৰিছিল৷ এইসকল বিয়াগোম নেতাৰে চুপাৰি ছিণ্ডিকেটৰ মাফিয়াগৰাকীৰ নৈশভোজৰ আলোকচিত্ৰই এতিয়া ৰাজ্যজুৰি ব্যাপক চৰ্চা লাভ কৰিছে৷ সামাজিক মাধ্যমতো ভাইৰেল হৈ পৰিছে এইসমূহ আলোকচিত্ৰ৷ অসমৰ শাসকীয় দলৰ বিয়াগোম নেতাৰ ছিণ্ডিকেট মাফিয়াৰে এনে হলিগলি আৰু নৈশভোজ পৰ্যন্তত অংশগ্ৰহণৰ আলোকচিত্ৰই ছিণ্ডিকেট মাফিয়াৰে চৰকাৰ আৰু শাসকীয় দলৰ ঘনিষ্ঠতাৰ সৰ্বোচ্চ প্ৰমাণ হিচাপে বিবেচিত হৈছে৷ যিখন ৰাজ্যত শাসকীয় দলৰ বৰ বৰ নেতাই ছিণ্ডিকেট মাফিয়াৰে ৰাজনৈতিক ভৱিষ্যৎ সুৰক্ষিত কৰি ৰখাৰ বাবে সম্পৰ্ক চলাই ৰাখে, সেইখন ৰাজ্যত ছিণ্ডিকেটৰাজ বন্ধ হ’ব বুলি ভবাতো সুদূৰপৰাহত৷