অবিজেপিশাসিত ৰাজ্যৰ সৈতে মোদীৰ সংঘাত বাঢ়িছে কিয়? পশ্চিম বংগৰ পৰা তেলেংগানালৈ বিদ্ৰোহ

ডিজিটেল ডেস্ক: ক্ৰমাৎ অবিজেপিশাসিত ৰাজ্যৰ সৈতে সংঘাত বৃদ্ধি পাইছে কেন্দ্ৰৰ৷ বিজেপিশাসিত কেন্দ্ৰীয় চৰকাৰৰ সৈতে মনোমালিন্য বৃদ্ধি পাবলৈ ধৰিছে অবিজেপিশাসিত ৰাজ্যৰ৷ প্ৰধানমন্ত্ৰী নৰেন্দ্ৰ মোদীৰ প্ৰতিও আস্থা হেৰুৱাইছে তেনে ৰাজ্যৰ মুখ্যমন্ত্ৰীয়ে৷ পশ্চিম বংগৰ মুখ্যমন্ত্ৰী মমতা বেনাৰ্জীৰে প্ৰধানমন্ত্ৰীৰ সংঘাত সৰ্বজনবিদিত৷ পশ্চিম বংগৰ মুখ্যমন্ত্ৰী বেনাৰ্জীক প্ৰায়ে সমালোচনাৰ লক্ষ্য কৰি লয় বিজেপিয়ে৷ কেন্দ্ৰৰ ভুল নীতি আৰু জনবিৰোধী সিদ্ধান্তৰ বিৰুদ্ধে বলিষ্ঠকণ্ঠে প্ৰতিবাদ কৰি আহিছে মমতা বেনাৰ্জীয়ে৷ পশ্চিম বংগত কোনো সিদ্ধান্তই কেন্দ্ৰই জোৰ কৰি জাপি দিব নোৱাৰে একমাত্ৰ মমতা বেনাৰ্জীৰ দৃঢ় স্থিতিৰ বাবে৷ শেহতীয়াকৈ দেখা গ’ল, তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৱে শাৰীৰিক অসুস্থতাৰ দোহাই দি প্ৰধানমন্ত্ৰীক ৰাজ্যখনত আদৰণি জনোৱাৰ পৰা বিৰত থাকিল৷ চন্দ্ৰশেখৰ ৰাওৰ এই স্থিতি ইতিমধ্যে চৰ্চিত হৈছে৷ একেদৰে, পঞ্জাবৰ সৈতেও কেন্দ্ৰ তথা মোদীৰ সংঘাত দীৰ্ঘদিনীয়া৷ পঞ্জাবৰ মুখ্যমন্ত্ৰী চন্নী আৰু পঞ্জাব কংগ্ৰেছৰ অন্য নেতাৰ বিৰুদ্ধে বিজেপিয়ে ধাৰাবাহিকভাৱে বিভিন্ন অভিযোগত অভিযান অব্যাহত ৰাখিছে৷ নিৰ্বাচনৰ পূৰ্বে পঞ্জাব কংগ্ৰেছৰ মাজত এক চাপ সৃষ্টি কৰিবলৈ কেন্দ্ৰীয় চৰকাৰৰ সেয়া কৌশল বুলি মন্তব্য কৰিছে পঞ্জাবৰ মুখ্যমন্ত্ৰীয়ে৷ অভিযোগ শুনা যায় যে, মূলতঃ শাসকীয় বিজেপিৰ উদ্দেশ্য হৈছে যুক্তৰাষ্ট্ৰীয় ব্যৱস্থাক তচনচ কৰি ৰাষ্ট্ৰীয়তাবাদৰ আগ্ৰাসনেৰে সমগ্ৰ ভাৰতখন শাসন কৰা৷ যিটো গণতান্ত্ৰিক ব্যৱস্থাৰ পৰিপন্থী এটা বিষয়৷ হিন্দী বলয়ৰ হিন্দুত্ববাদ প্ৰান্তীয় ৰাজ্যবোৰত জাপি দি তেনে ৰাজ্যসমূহৰ ভাষা, কৃষ্টিৰ বিচিত্ৰতা ধ্বংস কৰিব বিচাৰে তেওঁলোকৰ ৰাজনীতিয়ে৷ আৰু তাৰেই বিপৰীতে মমতা বেনাৰ্জীয়ে ধাৰাবাহিকভাৱে স্থিতি গ্ৰহণ কৰি আহিছে৷ কিয়নো, ভাৰতৰ পৰিচয়ে হৈছে অনৈক্যৰ মাজত ঐক্য৷ দেশখনৰ বৰ্ণিল বিচিত্ৰতাই দেশখনৰ প্ৰাথমিক পৰিচয়৷ তেনেস্থলত, বিজেপিৰ আগ্ৰাসী মনোবৃত্তিয়ে অবিজেপিশাসিত ৰাজ্যসমূহৰ সৈতে বৃদ্ধি কৰিছে সংঘাত, আনি দিছে দুৰত্ব৷