আকৌ বাজিব কেৰ'ল,জ্বলিব মম! সুদীৰ্ঘ ৩০ বছৰৰ পাছত পুনৰ মুকলি ১২৫ বছৰ পুৰণি গীৰ্জা

ডিজিটেল ডেস্কঃ বৰদিনৰ সময় তেনেই সমাগত। পদূলিমুখত আহি ৰৈ আছেহি খ্ৰীষ্টান ধৰ্মাৱলম্বী লোকসকলৰ অতি পবিত্ৰ উৎসৱ খ্ৰীষ্টমাছ বা বৰদিন। জম্মু-কাশ্মীৰৰ আটাইতকৈ পুৰণি গীৰ্জাসমূহৰ ভিতৰত অন্যতম চেইণ্ট লুকচ গীৰ্জা ৩০ বছৰৰ পাছত পুনৰ মুকলি কৰা হৈছে। শ্ৰীনগৰত অৱস্থিত প্ৰায় ১২৫ বছৰ পুৰণি গীৰ্জাটো ১৯৯০ৰ দশকত উগ্ৰবাদীৰ সন্ত্ৰাসৰ বাবে বন্ধ কৰি দিয়া হৈছিল। চহৰখনৰ ডালগেট অঞ্চলৰ শংকৰাচাৰ্য পাহাৰৰ পাদদেশত হৃদৰোগ চিকিৎসালয়ৰ ওচৰত অৱস্থিত গীৰ্জাটো বৃহস্পতিবাৰে আনুষ্ঠানিকভাৱে ৰাইজৰ বাবে মুকলি কৰা হ'ব। গীৰ্জাটো পুনৰ নিৰ্মাণ কৰি ইয়াৰ গীৰ্জাটোৰ পুৰণি গৌৰৱ উদ্ধাৰ কৰিবলৈ ইয়াক পুনৰ নিৰ্মাণ কৰি সুদীৰ্ঘ ৩০ বছৰৰ পাছত মুকলি কৰি দিয়া হৈছে। স্মাৰ্ট চিটি প্ৰকল্পৰ অধীনত জম্মু-কাশ্মীৰৰ পৰ্যটন বিভাগে গীৰ্জাৰ নৱীকৰণৰ কাম হাতত লৈছিল।

চেইণ্ট লুকচ গীৰ্জা বৃহস্পতিবাৰে জম্মু-কাশ্মীৰৰ লেফটেনেণ্ট গভৰ্ণৰ মনোজ সিনহাই উদ্বোধন কৰিব। এই প্ৰচেষ্টাত খ্ৰীষ্টান ধৰ্মৰ লোকসকল সুখী হৈ পৰিছে। যদিও বৰদিন অৰ্থাৎ খ্ৰীষ্টমাছ খ্ৰীষ্টান ধৰ্মৰ লোক সকলৰ এক ধৰ্মীয় উৎসৱ, তথাপি দেখা যায় যে বিশ্বৰ প্ৰায় আটায়েই জাতি, ধৰ্ম, বৰ্ণ আৰু ভাষা নিৰ্বিশেষে এই পবিত্ৰ দিনটোলৈ সমান উৎসাহেৰে বাট চাই ৰয়৷ বৰদিন মানেই যেন আনন্দৰ উৎসৱ ৷ সুখ, হাঁহি, মৰম ভালপোৱাৰৰ উৎসৱ৷সেয়েহে এনে পৱিত্ৰ উৎসৱ উদযাপনৰ প্ৰাকমূহুৰ্তত এটা ঐতিহাসিক গীৰ্জাৰ দুৱাৰ পুনৰ মুকলি হোৱাত সকলো লোকেই সুখী হৈ পৰিছে। ৩০ বছৰৰ পাছত চেইণ্ট লুকচ গীৰ্জাত পুনৰ বাজিব পবিত্ৰ বেলৰ ধ্বনি, মমৰ পোহৰত আলোকিত হৈ পৰিব চৌপাশ আৰু সকলো লোক একত্ৰিত হৈ গোৱা কেৰ'লে মানুহৰ বুকুলৈ বোৱাব ভক্তিৰ প্ৰবাহ।

আৰু পঢ়কঃ জিম নাযায়,ডায়েটিং নকৰে! অসমৰ জোঁৱাই মিলিন্দ সুমনৰ ফিটনেছৰ আঁৰৰ ৰহস্য কি?