ডিজিটেল ডেস্কঃ উত্তৰ প্ৰদেশত নিৰাপত্তাহীনতাত ভুগিছে স্বয়ং এজন বিধায়ক৷ উত্তৰ প্ৰদেশৰ পৰা পোহৰলৈ আহিছে এজন বিজেপি বিধায়কৰ পত্নীৰ নিৰুদ্দেশৰ খবৰ। চুলতানপুৰ জিলাৰ লম্ভুৱা বিধানসভা সমষ্টিৰ বিজেপি বিধায়ক সীতানাথ বাৰ্মাৰ পত্নী মঙলবাৰৰ পৰা সন্ধানহীন হৈ আছে। জানিব পৰা তথ্য অনুসৰি বিজেপি বিধায়ক সীতাৰাম বাৰ্মাৰ পত্নী লক্ষ্ণৌৰ ইন্দিৰানগৰ বাসগৃহৰ পৰা মঙলবাৰৰ পুৱা হঠাতে সন্ধানহীন হৈ পৰে।
ইয়াৰ পাছত পৰিয়ালৰ লোকে বিয়লিলৈকে মহিলাগৰাকীক বিচাৰে যদিও বিচাৰি উলিওৱাত ব্যৰ্থ হয়৷পৰৱৰ্তী সময়ত বিধায়কগৰাকীৰ পুত্ৰই গাজীপুৰ থানাত এফআইআৰ দাখিল কৰে। জানিব পৰা মতে বিজেপি বিধায়কগৰাকীৰ পত্নী দীৰ্ঘদিন ধৰি স্মৃতি হেৰাই যোৱা ৰোগত আক্ৰান্ত হৈ আছিল৷
উল্লেখ্য যে সীতাৰাম বাৰ্মা চুলতানপুৰৰ লম্ভুৱা সমষ্টিৰ বিজেপি বিধায়ক।আৰক্ষীয়ে জনোৱা মতে, মঙলবাৰে পুৱা প্ৰায় ৯ বজাত ইন্দিৰানগৰৰ অৰবিন্দ পাৰ্ক চৌকৰ সমীপত পুষ্পা বাৰ্মাক দেখা গৈছিল। ইতিমধ্যে চিচিটিভি কেমেৰাৰ সহায়ত তালাচী চলোৱা হৈছে।এই কাৰ্যত ৬টা আৰক্ষী দলক প্ৰেৰণ কৰা হৈছে৷ তদুপৰি মহিলাগৰাকীক সন্ধানৰ ক্ষেত্ৰত আৰক্ষীয়ে সামাজিক মাধ্যমৰো সহায় লৈছে ৷
Continue Reading
