ডিজিটেল ডেস্কঃ আৰক্ষীক কামুৰিলে আটকাধীন ব্যক্তিয়ে। চিকিৎসালয়ৰ বিচনা আশ্ৰয়স্থল হৈ পৰিল আৰক্ষীৰ! শেহতীয়াকৈ সংঘটিত এনেকুৱা এক আজৱ ঘটনাই ব্যাপক চাঞ্চল্যৰ সৃষ্টি কৰিছে। এই ঘটনা সংঘটিত হৈছে কেৰালাত।
এগৰাকী ব্যক্তিক আটক কৰি বাহনত উঠাই থানালৈ লৈ যোৱাৰ সময়তে কাণত প্ৰচণ্ড কামোৰ খাব লগীয়া হৈছে এগৰাকী আৰক্ষী বিষয়াই।
প্ৰকাশিত খবৰ অনুসৰি, কেৰালাৰ কাছাৰাগোডত ষ্টেনি ৰড্ৰিগেজ নামৰ এগৰাকী ব্যক্তি বাইক দুৰ্ঘটনাত পতিত হয়। সেই সময়ত উক্ত স্থানত টহল দি থকা আৰক্ষী জোৱানসকলে তেওঁক দুৰ্ঘটনাস্থলীৰ পৰাই জিম্মাত লৈ বাহনত উঠাই লৈ যায়।
ব্যক্তিগৰাকীক থানালৈ নিয়াৰ সময়ত গাড়ীখনৰ সন্মুখৰ চিটত বহি আছিল উপ-পৰিদৰ্শকগৰাকী। বাহনখন চলি থকা অৱস্থাতে হঠাতে আটকাধীন ব্যক্তিগৰাকীয়ে খঙৰ ভমকত আৰক্ষী উপ-পৰিদৰ্শকগৰাকীৰ সোঁ কাণত জোৰেৰে কামুৰ লগায়।
এই আকস্মিক তথা অভাৱনীয় আক্ৰমণত বিষ্ণু প্ৰসাদ নামৰ কাছাৰাগোডৰ টাউন আৰক্ষী থানাৰ উপ-পৰিদৰ্শকগৰাকী আঘাতপ্ৰাপ্ত হয় আৰু লগে লগে তেওঁক চিকিৎসাৰ বাবে স্থানীয় এখন চিকিৎসালয়লৈ লৈ যোৱা হয়।
জৰুৰীকালিন চিকিৎসাৰ পিছত উপ-পৰিদৰ্শকগৰাকীক আন এখন ব্যক্তিগত চিকিৎসালয়লৈ লৈ যোৱা হয় বুলি আৰক্ষীয়ে সংবাদ মাধ্যমৰ আগত উল্লেখ কৰে।
Continue Reading
