ডিজিটেল ডেস্কঃ তামিলনাডুৰ তিৰুপট্তুৰ জিলাত সংঘটিত হৈছে এক ভয়াৱহ দুৰ্ঘটনা। এক উপহাৰ বিতৰণ অনুষ্ঠানত হোৱা ব্যাপক সমাগমৰ ফলত পদপিষ্টহৈ প্ৰাণ হেৰুৱাইছে চাৰিগৰাকী মহিলাই। এই ঘটনাত লগতে আন ১০ গৰাকী মহিলাও আহত হৈছে।
প্ৰকাশিত খবৰ অনুসৰি, থাইপুছম উৎসৱ উপলক্ষে বিনামূলীয়াকৈ শাড়ী আৰু ধূতি প্ৰদানৰ উদ্দেশ্যে স্থানীয় এগৰাকী ব্যৱসায়ী তথা সমাজকৰ্মীয়ে আয়োজন কৰিছিল এই অনুষ্ঠানৰ।
তিৰুপট্তুৰ জিলাৰ ভানিয়াম্বাদী অঞ্চলত অনুষ্ঠিত হোৱা এই অনুষ্ঠানত প্ৰায় ৫০০ গৰাকী মহিলা উপহাৰ গ্ৰহণৰ বাবে সমবেত হৈছিল।
উপহাৰ ল’বলৈ সমবেত মহিলাসকলে হেতা-উপৰা কৰাৰ লগে লগে ব্যাপক অস্থিৰতাৰ সৃষ্টি হয় আৰু এই হেঁচা-ঠেলাত চাৰিগৰাকী মহিলাৰ মৃত্যু হয়। ঘটনাত প্ৰায় ১৫ গৰাকী মহিলা আহত হোৱা বুলিও জানিব পৰা গৈছে।
ঘটনাৰ বিষয়ে খবৰ লাভ কৰাৰ পিছতে স্থানীয় আৰক্ষী আৰু জিলা প্ৰশাসনৰ বিষয়া ঘটনাস্থলীত উপস্থিত হয়। আহতসকলক চিকিৎসাৰ বাবে স্থানীয় ভানিয়াম্বাদী চৰকাৰী চিকিৎসালয়লৈ প্ৰেৰণ কৰা হৈছে বুলি বিষয়াসকলে জানিবলৈ দিয়া হয়।
Continue Reading
