ডিজিটেল ডেস্কঃ সম্প্ৰতি চৰকাৰী ভ্ৰমণসূচীলৈ নতুন দিল্লীলৈ যোৱা অসমৰ মুখ্যমন্ত্ৰী ড০ হিমন্ত বিশ্ব শৰ্মাই শুকুৰবাৰে সংবাদমাধ্যমৰ আগত কেইবাটাও কথা প্ৰকাশ কৰে। মুখ্যমন্ত্ৰী ড০ শৰ্মাই কয় যে ফেব্ৰুৱাৰী মাহত কাৰ্ৱি যুৱ মহোৎসৱলৈ ৰাষ্ট্ৰপতি দ্ৰৌপদী মুৰ্মুক আমন্ত্ৰণ জনোৱা হৈছে। একেদৰে ফেব্ৰুৱাৰী মাহত প্ৰধানমন্ত্ৰী নৰেন্দ্ৰ মোদীক কামাখ্যা কৰিডৰ মুকলি কৰাৰ বাবে আমন্ত্ৰণ জনোৱা হৈছে।
নিয়াৰ সঞ্চালক প্ৰধানৰ সৈতে ত্ৰিপুৰা হৈ অসমত প্ৰৱেশ কৰা ৰোহিংগিয়া অনুপ্ৰবেশকাৰীৰ বিষয় সন্দৰ্ভতো মুখ্যমন্ত্ৰীগৰাকীয়ে বিভিন্ন পক্ষৰ সৈতে আলোচনা কৰা বুলি সংবাদমাধ্যমৰ আগত কয়। মুখ্যমন্ত্ৰীয়ে লগতে কয় যে বহুবিবাহৰ ক্ষেত্ৰত ফেব্ৰুৱাৰী মাহত অসম বিধানসভাত এখন বিধেয়ক অনা হ'ব। ইনটেলিজেঞ্চ ব্যুৰ’ৰ সঞ্চালক তথা অসম সন্তান তপন কুমাৰ ডেকাক দিল্লীত সৌহাদ্যমুলক সাক্ষাৎ কৰাৰ কথাও মুখ্যমন্ত্ৰীয়ে প্ৰকাশ কৰে। আলফাৰ আলোচনাপন্থী গোটৰ সৈতে শান্তি চুক্তি স্বাক্ষৰিত হোৱাৰ প্ৰক্ৰিয়া আগবাঢ়িছে বুলিও মুখ্যমন্ত্ৰীয়ে কয়।
জানুৱাৰীৰ প্ৰথম সপ্তাহত শান্তি চুক্তি স্বাক্ষৰিত তেওঁ প্ৰকাশ কৰে। চুক্তিখনৰ খচৰাত "৬ নং দফা" ৰ বিষয়টোৱে গুৰুত্ব পাইছে বুলিও তেওঁ উল্লেখ কৰে। মুখ্যমন্ত্ৰীয়ে কয় -আলোচনাপন্থী আলফাৰ সৈতে চুক্তি সম্পাদিত হোৱাৰ পিছত আমি পৰেশ বৰুৱাৰ সৈতে আলোচনা কৰিম ৷
দুটামান গ্ৰেনেড ফুটালে অসম স্বাধীন হ'ব নেকি বুলিও মুখ্যমন্ত্ৰী শৰ্মাই প্ৰশ্ন কৰে। অসমত এনে পৰিস্থিতি হৈ থাকিলে অসম পিছুৱাইহে যাব ৷ নিজৰ জননী জনমভূমিৰ ওপৰত কোনোবাই বোমা ফুটাই নেকি বুলিও মুখ্যমন্ত্ৰীয়ে প্ৰশ্ন কৰে।
Continue Reading
