ৰাম লীলা ময়দানৰ ৰামদেৱ কা্ণ্ডৰ পুনৰাবৃত্তি! মল্লযোদ্ধাৰ প্ৰতিবাদস্থলী যন্তৰ মন্তৰৰ চৌদিশে বিশাল আৰক্ষী বাহিনী মোতায়েন, বেৰিকেড স্থাপন

কিছু বছৰৰ বিৰতিত তদ্ৰুপ ঘটনাৰেই পুনৰাবৃত্তি ঘটিল দিল্লীত। কুস্তি ফেডাৰেচন অৱ ইণ্ডিয়াৰ (ডব্লিউএফআই) সভাপতি তথা বিজেপি সাংসদ ব্ৰজ ভূষণ চৰণ সিঙৰ বিৰুদ্ধে খেলুৱৈক যৌন নিৰ্যাতনৰ অভিযোগ তুলি আন্দোলন অব্যাহত ৰখা দেশৰ আগশাৰীৰ মল্লযোদ্ধাসকলৰ প্ৰতিবাদস্থলীত যোৱা নিশা হঠাতে আৰক্ষী উপস্থিত হৈ তাণ্ডৱ চলোৱাৰ অভিযোগ উঠিছে।  প্ৰতিবাদকাৰী মল্লযোদ্ধা আৰু কিছু আৰক্ষীৰ মাজত হতাহতি লগা বুলিও অভিযোগ উঠিছে। এনে ঘটনাৰ পিছে  দিল্লী আৰক্ষীয়ে যন্তৰ মন্তৰৰ চাৰিওফালে পৰ্যাপ্ত নিৰাপত্তা ব্যৱস্থা গ্ৰহণ কৰিছে।

সূত্ৰ অনুসৰি উক্ত স্থানত বিশাল আৰক্ষী বাহিনী মোতায়েন কৰা হৈছে আৰু সমগ্ৰ অঞ্চলটোত বেৰিকেড স্থাপন কৰা হৈছে। আৰক্ষীয়ে মল্লযোদ্ধাসকলক সমৰ্থন কৰা ৰাজ্যসভাৰ সাংসদ দীপেন্দ্ৰ হুডা আৰু দিল্লী মহিলা আয়োগৰ (ডিচিডব্লিউ) অধ্যক্ষা স্বাতী মালিৱালকো আটক কৰিছে ।প্ৰায় ১৫ জন লোকক আটক কৰি  এখন বাছত তুলি নিয়া বুলিও জানিব পৰা গৈছে। অভিযোগ অনুসৰি আৰক্ষীৰে হোৱা হতাহতিত  কেইজনমান প্ৰতিবাদকাৰীয়ে মূৰত আঘাত পাইছে। মল্লযোদ্ধাসকলে অভিযোগ কৰিছে যে তেওঁলোকক আৰক্ষী কৰ্মীয়ে প্ৰহাৰ কৰিছে।

ঘটনাটোৰ পিছত কংগ্ৰেছ নেতা দীপেন্দ্ৰ হুদা আৰু আম আদমী পাৰ্টিৰ (আপ) বিধায়ক সোমনাথ ভাৰতীকে ধৰি চাৰিজন লোকক আটক কৰা হৈছে বুলি আৰক্ষীয়ে প্ৰকাশ কৰিছে। ছ'চিয়েল মিডিয়া প্লেটফৰ্মত প্ৰচাৰিত এটা ভিডিঅ'ত কিছুসংখ্যক  প্ৰতিবাদকাৰীয়ে এজন আৰক্ষী কৰ্মীয়ে সুৰাৰ নিচাত দুজন মল্লযোদ্ধাক আক্ৰমণ কৰাৰ অভিযোগ উত্থাপন কৰা শুনা গৈছে। ইপিনে যৌন নিৰ্যাতনৰ অভিযোগ তুলি প্ৰতিবাদ অব্যাহত ৰখা মল্লযোদ্ধাসকলৰ প্ৰতি  সমৰ্থন জনাইছে বিজেপিৰ এজন নেতাই৷  প্ৰাক্তন কেন্দ্ৰীয় মন্ত্ৰী বীৰেন্দ্ৰ সিং আৰু হাৰিয়ানাৰ শক্তি মন্ত্ৰী ৰঞ্জিত সিং চৌটালাই শেহতীয়াকৈ মল্লযোদ্ধাসকলৰ পক্ষ লৈ কয় যে "তেওঁলোকৰ দ্বাৰা উত্থাপিত অভিযোগ গুৰুতৰ "।

 হাৰিয়ানাৰ বাসিন্দা বিনেশ ফোগাট, বজৰং পুনিয়া আৰু সাক্ষী মালিককে ধৰি প্ৰতিবাদকাৰী মল্লযোদ্ধাসকলে কুস্তি ফেডাৰেচন অৱ ইণ্ডিয়াৰ (ডব্লিউএফআই) সভাপতি তথা বিজেপি সাংসদ ব্ৰজ ভূষণ চৰণ সিঙৰ বিৰুদ্ধে ব্যৱস্থা গ্ৰহণৰ দাবী জনাই আহিছে৷ সিঙৰ  বিৰুদ্ধে তেওঁলোকে যৌন নিৰ্যাতন আৰু অপৰাধমূলক ভাবুকিৰ অভিযোগ উত্থাপন কৰিছে। জ্যেষ্ঠ বিজেপি নেতা বীৰেন্দ্ৰ সিঙে কৈছিল: "এই বিষয়ত এটা নিৰপেক্ষ তদন্ত হ'ব যিয়ে আন্দোলনকাৰী খেলুৱৈসকলক সন্তুষ্ট কৰিব’’।  তেওঁ লগতে কয় যে আমাৰ দেশত মল্লযুদ্ধত মহিলাসকলৰ অংশগ্ৰহণ খুব বেছিদিনৰ কথা  নহয়। সেয়েহে, তেওঁলোকক এই ক্ষেত্ৰত  উৎসাহিত লাগে ৷ আনহাতে মনোহৰ লাল খট্টৰ চৰকাৰক সমৰ্থন কৰা এজন নিৰ্দলীয়  বিধায়ক ৰঞ্জিত চৌটালাই লগতে কয় যে এনে ধৰণৰ  অভিযোগ উঠা ব্যক্তিয়ে নিজকে ৰক্ষা কৰিব নালাগে,  পদত্যাগৰ প্ৰস্তাৱ দিব লাগে। 

প্ৰাক্তন উপ প্ৰধানমন্ত্ৰী দেৱী লালৰ পুত্ৰ ৰঞ্জিত চৌটালাই লগতে কৈছিল, "লাল বাহাদুৰ শাস্ত্ৰীয়ে ১৯৫৬ চনত এটা ৰে’ল দুৰ্ঘটনাৰ বাবে পদত্যাগ পত্ৰ প্ৰদান কৰিছিল। মই হাৰিয়ানা মন্ত্ৰীসভাৰ পৰা আন ছয়জন মন্ত্ৰীৰ সৈতে পদত্যাগ কৰিছিলো যেতিয়া মেহামত (১৯৯০ চনত) গুলীচালনা হৈছিল ষ সেই ঘটনাত আঠজন লোকৰ মৃত্যু হৈছিল। সত্যটো সোনকালে ৰাইজৰ সন্মুখলৈ আহিব লাগে আৰু মই অনুভৱ কৰো যে এয়া  দীঘলীয়া হৈ থকা উচিত নহয়। চৰকাৰে জনসাধাৰণৰ বিশ্বাস আদায় কৰিব   লাগে।" 

উল্লেখ্য দিল্লীৰ যন্তৰ মন্তৰত ন্যায় লাভৰ আশাত প্ৰতিবাদ কৰি অহা মল্লযোদ্ধাসকলৰ কাষত থিয় দিছে কেইবাটাও বিৰোধী ৰাজনৈতিক দলৰ নেতা-নেত্ৰীয়ে৷ পশ্চিম বংগৰ মুখ্যমন্ত্ৰী মমতা বেনাৰ্জী, কৰ্ণাটক কংগ্ৰেছৰ মুৰব্বী ডি কে শিৱকমাৰ, কেৰালা কংগ্ৰেছৰ সাংসদ শশী থাৰুৰ, আৰএলডিৰ মুৰব্বী জয়ন্ত সিনহা আৰু দিল্লীৰ শাসনাধিষ্ঠ আম আদমী পাৰ্টীকে ধৰি বিৰোধী দলৰ নেতাসকলে শুকুৰবাৰে ভাৰতীয় ডব্লিউএফএছৰসভাপতি ব্ৰজ ভূষণ চৰণ সিঙৰ বিৰুদ্ধে  আন্দোলন কৰি থকা শীৰ্ষ মল্লযোদ্ধাসকলৰ প্ৰতি   চৰ্তহীন সমৰ্থন আগবঢ়াইছে। ইপিনে বহুতে এইবুলি অভিযোগ কৰিছে যে চৰকাৰে মল্লযোদ্ধাসকলৰ প্ৰতিবাদৰ প্ৰতি বহুতে সমৰ্থন দিয়াৰ পিছতে বিষয়টোকলৈ সচেতন হৈ পৰিছে। অভিযোগ অনুসৰি বল প্ৰয়োগ কৰি হ’লেও চৰকাৰে মল্লযোদ্ধাসকলৰ প্ৰতিবাদ মষিমূৰ কৰিব বিচাৰিছে।