ডিজিটেল ডেস্কঃ বতৰৰ পৰিৱৰ্তনৰ ভয়াবহ ইংগিত পোৱা গ’ল দেশৰ ৰাজধানী চহৰ নতুন দিল্লীত। দুদিন আগলৈকে প্ৰচণ্ড গ্ৰীষ্ম প্ৰবাহে জনজীৱন ব্যাহত কৰা নতুন দিল্লীত হঠাতে নামি আহিল পুহমহীয়া শীত ! ৪১ বছৰৰ পিছত ৰাজধানী চহৰ খনত সৰ্বনিম্ন হ’ল তাপমাত্ৰা। ১৯৮২ চনৰ ২ মে'ত চহৰ খনৰ সৰ্বনিম্ন তাপমাত্ৰা আছিল ১৫.২ ডিগ্ৰী চেলচিয়াছ।
তাৰ পিছত ২০২৩ চনকৰ আজিৰ দিনটোত তাপমাত্ৰা হ’ল ১৫.৮ ডিগ্ৰী চেলচিয়াছ। শেহতীয়াকৈ বৰষুণৰ বাবেই ৰাজধানী চহৰ খনৰ তাপমাত্ৰা হ্ৰাস পোৱা পৰিবেশ যেন পুনৰ ঘূৰাই আনিছে। উল্লেখ্য মাত্ৰ কেইদিন পূৰ্বে দিল্লীৰ তাপমাত্ৰা ৪৫-৪৬ ডিগ্ৰীত উপনীত হৈছিল। কোনেও কল্পনাও কৰিব পৰা নাছিল যে তাপমাত্ৰা এটা ঢাপতে এনেদৰে ১৫ ডিগ্ৰীলৈ হ্ৰাস পাব।
কেৱল তাপমাত্ৰা হ্ৰাস পোৱাই নহয়, বৃহস্পতিবাৰে পুৱাৰে পৰা সমগ্ৰ ৰাজধানী চহৰ খন কুঁৱলীৰ ডাঠ কম্বলে ঢাকি ধৰে। চহৰ খনত দৃশ্যমানতাও যথেষ্ট হ্ৰাস পায়। পুৱা পাতলীয়া বৰষুণো হয়। চহৰ খনত আজি প্ৰায় ৩০ মিলিমিটাৰ বৰষুণ হোৱা বুলি বতৰ বিজ্ঞান কেন্দ্ৰই প্ৰকাশ কৰিছে। প্ৰকৃতিৰ এনে বিচিত্ৰ ৰূপত এতিয়া হতবাক হৈ পৰিছে চহৰ খনৰ বাসিন্দাসকল।
Continue Reading
