ডিজিটেল ডেস্ক: আহি পালে বহুপ্ৰতীক্ষিত সেই ক্ষণ৷ সুদীৰ্ঘ সময়ৰ বুৰঞ্জীৰ বাট গচকি অৱশেষত কাইলৈ অযোধ্যাত ৰাম মন্দিৰৰ প্ৰাণ প্ৰতিষ্ঠা কৰোৱা হ’ব৷ ৰাম মন্দিৰৰ প্ৰাণ প্ৰতিষ্ঠা সমাৰোহক কেন্দ্ৰ কৰি দেশত এতিয়া উৎসৱমুখৰ পৰিবেশ৷ কাইলৈৰ দিনটোত দেশবাসীৰ দৃষ্টি নিবদ্ধ থাকিব বিজেপিৰ প্ৰবীণ নেতা এল কে আদৱানীৰ ওপৰত৷ ৰাম মন্দিৰৰ এছোৱা ইতিহাসৰ সৈতে নিবিড়ভাৱে জড়িত লালকৃষ্ণ আদৱানী৷
কাইলৈ অযোধ্যাৰ ৰাম মন্দিৰৰ প্ৰাণ প্ৰতিষ্ঠা অনুষ্ঠানত বিজেপিৰ প্ৰবীণ নেতা এল কে আদৱানীয়ে অংশগ্ৰহণ কৰাৰ সম্ভাৱনা আছে। ৰাম জন্মভূমি আন্দোলনৰ নেতৃত্ব দিয়া বিজেপিৰ জ্যেষ্ঠ নেতাগৰাকীৰ উপস্থিতি এসপ্তাহ পূৰ্বে নিশ্চিত কৰিছিল বিশ্ব হিন্দু পৰিষদৰ এজন নেতাই। কিন্তু, দেওবাৰে নিশাপৰ্যন্ত এল কে আদৱানীৰ অযোধ্যা গমন সন্দৰ্ভত কোনো আনুষ্ঠানিক খবৰ ৰাজহুৱা হোৱা নাই৷
আদৱানীৰ উপৰিও ভিএইচপিয়ে ডিচেম্বৰত বিজেপিৰ আন এগৰাকী প্ৰবীণ নেতা মুৰলী মনোহৰ যোশীকো অযোধ্যাত ৰাম মন্দিৰ উদ্বোধনী অনুষ্ঠানত অংশগ্ৰহণ কৰিবলৈ আমন্ত্ৰণ জনাইছিল। কিন্তু সেই সময়ৰ মন্দিৰ ট্ৰাষ্টে কৈছিল যে বিজেপিৰ নেতাসকল তেওঁলোকৰ স্বাস্থ্যজনিত কাৰণত অনুষ্ঠানত উপস্থিত থকাৰ সম্ভাৱনা কম।
লালকৃষ্ণ আদৱানীয় ১৯৯০ চনত তেওঁৰ ৰাম ৰথযাত্ৰাৰ জৰিয়তে মাটি মুকলি কৰি দিছিল অযোধ্যাৰ ৰাম মন্দিৰৰ বাবে। গুজৰাটৰ সোমনাথৰ পৰা পবিত্ৰ অযোধ্যা নগৰলৈ ১০ হাজাৰ কিলোমিটাৰ অতিক্ৰম কৰি বৃহৎসংখ্যক হিন্দুক আকৰ্ষণ কৰা যাত্ৰাৰে একপ্ৰকাৰ আলোড়ন তুলিছিল আদৱানীয়ে৷
Continue Reading
