ডিজিটেল ডেস্কঃ আমেৰিকাত প্ৰায়েই ভাৰতীয় লোকসকল বৰ্ণ বিদ্বেষৰ চিকাৰ হৈ আহিছে৷ শেহতীয়াকৈ আমেৰিকা যুক্তৰাষ্ট্ৰত স্নাতকোত্তৰ পাঠ্যক্ৰম অধ্যয়ন কৰি থকা অন্ধ্ৰ প্ৰদেশৰ এজন ২৪ বছৰীয়া ছাত্ৰক গুলীয়াই হত্যা কৰে দুৰ্বৃত্তই৷
আমেৰিকা যুক্তৰাষ্ট্ৰৰ ওহাইঅ' প্ৰদেশৰ আৰক্ষীয়ে জনোৱা অনুসৰি ছাত্ৰ জনে পঢ়াৰ খৰচ উলিয়াবলৈ কাম কৰি থকা এটা পেট্ৰ’ল পাম্পতে তেওঁক গুলীয়াই হত্যা কৰা হৈছে৷ মৃত ছাত্ৰ জনৰ নাম চাইশ বীৰা বুলি আৰক্ষীয়ে প্ৰকাশ কৰিছে৷ বৃহস্পতিবাৰে প্ৰদেশ খনৰ কলম্বাছত এই ঘটনা সংঘটিত হয়৷ বীৰা অন্ধ্ৰ প্ৰদেশৰ বাসিন্দা আছিল।ঘটনা সংঘটিত হোৱাৰ খবৰ পোৱাৰ পিছতে নিৰাপত্তা বাহিনীৰ লোক গৈ ঘটনাস্থলীত উপস্থিত হয় আৰু আহত ছাত্ৰ জনক স্থানীয় চিকিৎসালয়লৈ লৈ যায়।
কিন্তু তেওঁৰ জীৱন ৰক্ষাৰ কৰিব পৰা নগ’ল৷ইতিমধ্যে ঘটনাটোৰ তদন্ত আৰম্ভ কৰিছে মাৰ্কিন আৰক্ষীয়ে৷ বীৰাৰ মৃতদেহ ভাৰতলৈ ঘূৰাই পঠিয়াবলৈ অনলাইন পুঁজি সংগ্ৰহ কাৰ্যসূচীৰ তত্বাৱধান কৰি থকা ৰোহিত য়ালামানচিলিৰ মতে মৃত যুৱকজনৰ স্নাতকোত্তৰ পাঠ্যক্ৰমৰ ফলাফল ওলাবলৈ মাত্ৰ ১০ দিন বাকী আছিল৷ তেওঁ আমেৰিকাত এইচ১ বি ভিছাৰ অধীনত অধ্যয়ন কৰি আছিল। উল্লেখ্য ইয়াৰ পূৰ্বেও আমেৰিকাত বহু কেইগৰাকী ভাৰতীয় লোকক দুৰ্বৃত্তই হত্যা কৰিছে৷ দেশ খন এককথাত ভাৰতীয়সকলৰ বাবে মুঠেও সুৰক্ষিত নহয় বুলি বহুতে মন্তব্য কৰিছে৷
Continue Reading
