ডিজিটেল ডেস্কঃ মহেন্দ্ৰ সিং ধোনীয়ে চাৰি বছৰ পূৰ্বে একদিনীয়া বিশ্বকাপত অন্তিমখন আন্তঃৰাষ্ট্ৰীয় মেচ খেলিছিল। এইবাৰ বিশ্বকাপৰ পূৰ্বে ভাৰতৰ প্ৰাক্তন অধিনায়কগৰাকীয়ে আমেৰিকাত ইউ এছ অ’পেনৰ কোৱাৰ্টাৰ ফাইনেলত কাৰ্লোছ আলকাৰাজৰ মেচ চাবলৈ যায়। তাৰপাছতে আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পৰ সৈতে গ’ল্ফ খেলে। আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰি ভাৰতৰ বিশ্বকাপ বিজয়ী অধিনায়কগৰাকীয়ে এনেদৰেই সময় অতিবাহিত কৰিছে।
ইউ এছ অ’পেনৰ কোৱাৰ্টাৰ ফাইনেলত আলকাৰাজ আৰু আলেকজেণ্ডাৰ জাৰেভৰ খেলখন চাবলৈ গৈছিল ধোনীয়ে। তেওঁক দৰ্শকৰ আসনত বহি থকা দেখা গ’ল। ইয়াৰ পিছতে নিউ জাৰ্চিৰ ট্ৰাম্পৰ নামেৰে নামাকৰণ কৰা গলফ ক্লাবত দেখা গ’ল ধোনীক। তাত ধোনীয়ে ট্ৰাম্পৰ সৈতে গলফ খেলিছিল। সেই ছবিখন পোষ্ট কৰিছিল এজন ভাৰতীয় ব্যৱসায়ীয়ে।
চেন্নাই ছুপাৰ কিংছে আই পি এলত পঞ্চমবাৰৰ বাবে ট্ৰফী অৰ্জন কৰাৰ পিছত ধোনীক ক্ৰিকেট খেলপথাৰত দেখা পোৱা নাই। আঁঠুৰ অস্ত্ৰোপচাৰ কৰা হৈছে বুলিও জনা যায়। পৰৱৰ্তী আই পি এলত ধোনীয়ে খেলিব নে নকৰে সেয়া এতিয়াও জানিব পৰা হোৱা নাই। তেওঁ নিজেই এই কথাটো স্পষ্ট কৰা নাছিল।
Continue Reading
