ডিজিটেল ডেস্কঃ ভাৰতীয় মল্লযুঁজ ফেডাৰেচনৰ বিদায়ী সভাপতি ব্রীজ ভূষণ শৰণ সিঙৰ বিৰুদ্ধে চলি থকা আন্দোলনৰ পৰা পিছুৱাই যোৱাৰ খবৰ মল্লযুঁজাৰুসকলে খাৰিজ কৰিছে৷ মল্লযুঁজাৰু সাক্ষী মালিক আৰু সত্যব্ৰত কদয়নে সোমবাৰে (৫ জুন) ফেচবুক লাইভত কয় যে আমাৰ যুঁজখন চৰকাৰৰ বিৰুদ্ধে নহয়, ব্রীজ ভূষণৰ বিৰুদ্ধে৷ এই কথা আমি আৰম্ভণিৰে পৰাই কৈ আহিছো।
অলিম্পিকৰ পদক বিজয়ী মল্লযুঁজাৰু সাক্ষী মালিকে কয় যে ন্যায় নোপোৱালৈকে তেওঁ যুঁজি থাকিব। সমৰ্থকসকলক ক'ম এনে সমৰ্থন বজাই ৰাখিব, ভুৱা বাতৰিৰ প্ৰতি গুৰুত্ব নিদিব। আমাৰ আন্দোলন অব্যাহত আছে। অলপ ধৰি ৰখা হৈছে কাৰণ আমি পৰিকল্পনা কৰিছো। চলি থকা ভুৱা বাতৰি সন্দৰ্ভত আজি গোটেই দিনটো আমি মানসিকভাৱে দুৰ্বল হৈ পৰিছো৷
সাক্ষী মালিকৰ স্বামী তথা মল্লযুঁজাৰু সত্যব্ৰত কদয়নে কয় যে আমাৰ যুঁজ ব্রীজ ভূষণৰ বিৰুদ্ধে৷ মল্লযুঁজ ফেডাৰেচনৰ সভাপতিৰ বিৰুদ্ধে।চাকৰি চৰকাৰৰ আৰু আমাৰ যুঁজ চৰকাৰৰ লগত নহয়। আমি ভাবিছিলো যে চৰকাৰী কামো বন্ধ হ’ব নালাগে, গতিকে ইমান নেতিবাচক দিশ কিয় দেখুওৱা হ’ল, আমি নাজানো।
ইয়াৰ পূৰ্বে সোমবাৰে সংবাদ সংস্থা এএনআইয়ে মল্লযুঁজাৰু সাক্ষী মালিকৰ বিষয়ে জনাইছিল যে তেওঁ ভাৰতীয় ৰে’লৱেত পুনৰ চাকৰিত যোগদান কৰিছে। এই খবৰ চৰ্চালৈ অহাৰ পিছতেই দাবী কৰা হৈছিল যে সাক্ষী মালিকে মল্লযুঁজাৰুৰ প্ৰতিবাদৰ পৰা নিজকে আঁতৰাই ৰাখিছিল। ইয়াৰ পিছত সাক্ষীয়ে টুইট কৰিছিল যে এই খবৰটো একেবাৰে ভুল। ন্যায়ৰ যুঁজত আমাৰ কোনোৱেই পিছুৱাই যোৱা নাই আৰু পাছলৈ নাযাওঁ৷
সাক্ষীৰ লগতে মল্লযুঁজাৰু বজৰং পুনিয়া আৰু বিনেশ ফ’গাটেও আন্দোলনৰ পৰা আঁতৰি অহাৰ খবৰ নাকচ কৰি ন্যায় নোপোৱালৈকে এই যুঁজ অব্যাহত থাকিব বুলি উল্লেখ কৰিছিল। আন্দোলন প্ৰত্যাহাৰ কৰাৰ খবৰটো মাথোঁ এটা উৰাবাতৰি। আমাৰ ক্ষতিৰ বাবে এই খবৰবোৰ প্ৰচাৰ কৰা হৈছে। যৌন নিৰ্যাতনৰ অভিযোগত ব্রীজ ভূষণ সিঙক গ্ৰেপ্তাৰ কৰিবলৈ দাবী জনাইছে মল্লযুঁজাৰুসকলে৷
Continue Reading
