ডিজিটেল ডেস্কঃ কাৰাগাৰত আছে ঝাৰখণ্ড প্ৰাক্তন মুখ্যমন্ত্ৰী হেমন্ত সোৰেন আৰু দিল্লীৰ মুখ্যমন্ত্ৰী অৰবিন্দ কেজৰিৱাল। হেমন্ত সোৰেনৰ পত্নী কল্পনা সোৰেনে শনিবাৰে দিল্লীত মুখ্যমন্ত্ৰী অৰবিন্দ কেজৰিৱালৰ পত্নী সুনীতা কেজৰিৱালক সাক্ষাৎ কৰে। কেজৰিৱালৰ গ্ৰেপ্তাৰৰ বিৰুদ্ধে কাইলৈ ৰামলীলা ময়দানত অনুষ্ঠিত হ'বলগীয়া 'মহা ৰেলী'ৰ পূৰ্বে সুনীতা-কল্পনাৰ মিলন তাৎপৰ্যপূৰ্ণ বিবেচিত হৈছে।
সুনীতা-কল্পনা কাৰাগাৰত থকা ৰাজনৈতিক নেতাদুগৰাকীৰ পত্নী, দুয়োৱে সেয়ে দুখৰ সমভাগী হোৱা পৰিলক্ষিত হয়। কল্পনাই কয় যে তেওঁলোকে তেওঁলোকৰ স্বামীৰ গ্ৰেপ্তাৰৰ বিৰুদ্ধে একেলগে যুঁজ দিয়াৰ সিদ্ধান্ত লৈছে। কল্পনাই কয় "দুমাহ আগতে ঝাৰখণ্ডত সংঘটিত ঘটনাটো এতিয়া দিল্লীত ঘটিছে। মুখ্যমন্ত্ৰী অৰবিন্দ কেজৰিৱালকো মোৰ স্বামী হেমন্ত সোৰেনৰ দৰে কাৰাগাৰলৈ প্ৰেৰণ কৰা হৈছে। মই সুনীতা কেজৰিৱালক লগ পাইছো আৰু আমি সিদ্ধান্ত লৈছো যে আমি এই গ্ৰেপ্তাৰৰ বিৰুদ্ধে যুঁজ দিম" ।
সংবাদ মাধ্যমৰ সৈতে বাৰ্তালাপ কৰি কল্পনা সোৰেনে কয় যে তেওঁ কাইলৈ ৰামলীলা ময়দানত ভাৰত মিত্ৰজোঁটৰ ৰেলীত অংশগ্ৰহণ কৰিব।তেওঁ কয় "মই আজি কংগ্ৰেছ সংসদীয় দলৰ অধ্যক্ষা ছোনিয়া গান্ধীকো সাক্ষাৎ কৰি ঝাৰখণ্ডৰ পৰিস্থিতি সন্দৰ্ভত অৱগত কৰিম। মই কাইলৈ ৰামলীলা ময়দানত ভাৰত মিত্ৰজোঁটৰ ৰেলীতো অংশগ্ৰহণ কৰি," ।
আপ নেতা ৰাঘৱ চাধাই দাবী কৰিছে যে সুনীতা-কল্পনাৰ এই মিলনে ভাৰতীয় মহিলাসকলৰ শক্তিৰ এক উদাহৰণ দাঙি ধৰিছে, "সাহস আৰু অনুগ্ৰহেৰে অন্যায়ৰ সন্মুখীন হৈ সুনীতা কেজৰিৱাল আৰু কল্পনা সোৰেনে ভাৰতীয় মহিলাৰ শক্তিৰ উদাহৰণ দিছে," চাধাই এক্সৰ এটা পোষ্টত কয়। উল্লেখ্য ভাৰত মিত্ৰজোঁটে ৩১ মাৰ্চত ৰামলীলা ময়দানত আবকাৰী নীতিৰ গোচৰত অৰবিন্দ কেজৰিৱালৰ গ্ৰেপ্তাৰৰ বিৰুদ্ধে মহাৰেলী ঘোষণা কৰিছে।
Continue Reading
