আমি পশ্চিমীয়া দেশৰ দৰে চলিব নোৱাৰো! বিবাহ সন্দৰ্ভত ছুপ্ৰীম কোৰ্টৰ গুৰুত্বপূৰ্ণ মন্তব্য

এগৰাকী ৪৪ বছৰীয়া অবিবাহিত মহিলাৰ আবেদনৰ শুনানিৰ সময়ত এনেদৰে মন্তব্য কৰে ছুপ্ৰীম কোৰ্টে। ভাৰতত বিবাহ অবিহনে চেৰ’গেচিৰ অনুমতি নাই। মহিলাগৰাকীয়ে বিবাহ নকৰোৱাকৈ চেৰ’গেচিৰ মাধ্যমেৰে মাতৃ হোৱাৰ অনুমতি বিচাৰি আদালতত আবেদন কৰিছিল।

আবেদনৰ শুনানি গ্ৰহণ কৰি ন্যায়াধীশ বি ভি নাগাৰাথ্না আৰু ন্যায়াধীশ অগাস্টিন জৰ্জ মাছিহৰ বিচাৰপীঠে কয়, "ভাৰতীয় সমাজত বিবাহ অবিহনে এগৰাকী অবিবাহিত মহিলাই সন্তান জন্ম দিয়াৰ কোনো নিয়ম নাই। বিয়া পাতি মাতৃ হোৱাটো আমাৰ দেশৰ বাবে আদৰ্শ। বিবাহ নকৰাকৈ মাতৃ হোৱাটো আদৰ্শ নহয়।"

ন্যায়াধীশ নাগাৰাথ্ণাই আৰু কয়, "আমি এই বিষয়ে সকলোৱে চিন্তা কৰা উচিত। আমি এই বিষয়ে শিশুৰ কল্যাণৰ দৃষ্টিকোণৰ পৰা কৈছো। দেশত বিবাহ অনুষ্ঠানটো জীয়াই থাকিব লাগে নে নাই? আমি পশ্চিমীয়া দেশৰ দৰে নহয়। ইয়াত কথাবোৰ তেনেকুৱা নহয়। আপুনি অৱশ্যেই আমাক ইয়াৰ বাবে বহু কথা শুনাব পাৰে, আমাক ৰক্ষণশীল বুলি টেগ লগাব পাৰে। হয় আমি কিছুমান কথাত ৰক্ষণশীল হোৱা প্ৰয়োজন। প্ৰতি দেশৰে নিজস্ব কৃষ্টি-সংস্কৃতি, সংস্কাৰ ধৰি ৰখাটো প্ৰয়োজন।"

বহুজাতিক কোম্পানীত কাম কৰা আবেদনকাৰীয়ে অধিবক্তা শ্যামল কুমাৰৰ জৰিয়তে চেৰ’গেচি (ৰেগুলেচন) আইনৰ ২(সমূহ) ধাৰাৰ বৈধতাক প্ৰত্যাহ্বান জনাই আদালতৰ কাষ চাপিছিল। শুনানিৰ আৰম্ভণিতে বিচাৰপীঠে মহিলাগৰাকীক কয় যে মাতৃ হোৱাৰ আন উপায়ো আছে। হয় তেওঁ বিয়া পাতক নহয় কোনো সন্তানক দত্তক(তুলি লোৱা) লওক। কিন্তু মহিলাগৰাকীৰ অধিবক্তাই কয় যে, "মহিলাগৰাকীয়ে বিয়া পাতিব নিবিচাৰে, আনহাতে দত্তক লোৱা প্ৰক্ৰিয়াৰ বাবে অপেক্ষাৰ সময় অতি দীঘলীয়া।" আদালতে এই সন্দৰ্ভত কয়, "বিবাহৰ দৰে বিষয় এটা খিৰিকীৰে বাহিৰলৈ পেলাই দিব নোৱাৰি। আমি পশ্চিমীয়া দেশৰ দৰে নহয় য'ত বহু সন্তানে মাক-দেউতাকৰ বিষয়ে নাজানে। মাক-দেউতাকৰ পৰিচয় নাজানে। আমি নিবিচাৰো যে আমাৰ দেশৰ সন্তানেও পিতৃ-মাতৃৰ কথা নজনাকে থাকক।"