ডিজিটেল ডেস্কঃ কণ্ঠশিল্পী নেহা কক্কৰৰ শেহতীয়া গীত ‘মেইনে পায়ল হায় ছনকাই’ৰ ৰিমিক্স ভাৰ্চনে যথেষ্ট বিতৰ্কৰ সৃষ্টি কৰিছে। ফাল্গুনী পাঠকৰ চিৰসেউজ গীত ‘মেইনে পায়ল হায় ছনকাই’ৰ ৰিমিক্স ভাৰ্চন বনাই ট্ৰ’লৰ সন্মুখীন হৈছে নেহা।
গানটো মুক্তিৰ পোৱাৰ পৰাই সমালোচনাৰ সন্মুখীন হৈছে নেহা কক্কৰ। নেহাই ফাল্গুনী পাঠকৰ সেই সুমধুৰ গীতটি নষ্ট কৰি পেলোৱা বুলি ক্ষোভ উজাৰে নেটিজেনসকলে। নেহা কক্কৰক লৈ খং উঠিছে ফাল্গুনী পাঠকৰো। এতিয়া চৰ্চালৈ আহিছে সংগীত জগতৰ প্ৰসিদ্ধ শিল্পী এ আৰ ৰহমানৰ প্ৰতিক্ৰিয়া।
এ আৰ ৰহমানে ৰিমিক্স সংস্কৃতিক লৈ প্ৰতিক্ৰিয়া প্ৰকাশ কৰিছে। তেওঁ নেহা কক্কৰৰ নাম লোৱা নাই যদিও তেওঁ এই কথা যে নেহাকে লক্ষ্য কৰি কৈছে সেই কথা সকলোৱে বুজি পাইছে। এ আৰ ৰহমানে কয় যে- ''যিমানেই ৰিমিক্স কালচাৰ হৈছে সিমানেই বিকৃত হৈছে। ৰিমিক্সত সুৰকাৰৰ উদ্দেশ্য বিকৃত হৈ পৰে। মানুহে কয় – মই গানটোক লৈ পুনৰ কল্পনা কৰিছো। পুনৰ কল্পনা কৰিবলৈ আপুনি কোন? আন কাৰোবাৰ কামত মই সদায় সাৱধান হৈ থাকোঁ। আপুনি আনৰ কামক সন্মান কৰা উচিত। এনেকুৱা কামবোৰৰ সমাধান আমি কৰিব লাগিব।''
এ আৰ ৰহমানৰ কথাৰ পৰা স্পষ্ট যে তেওঁ ৰিমিক্স সংস্কৃতিক সমৰ্থন নকৰে। বৰঞ্চ মূল কামটোৰ ওপৰত অধিক গুৰুত্ব দিয়ে। অৰিজিনেল ভাল পোৱা গায়ক আৰু সংগীতজ্ঞসকলে সদায় ৰিমিক্স বনোৱাৰ বিৰোধ কৰি আহিছে।
