ডিজিটেল ডেস্ক: দেশত এতিয়া গণতান্ত্ৰিক বিধি-ব্যৱস্থাৰ প্ৰতি সংকট নামি অহাৰ অভিযোগ সৰ্বত্ৰ৷ সংবিধানৰ প্ৰতিও ভাবুকি নামি অহাৰ অভিযোগ প্ৰায়ে উত্থাপন কৰে বিৰোধীয়ে৷ কিন্তু সকলো দেখিও সম্প্ৰতি নীৰৱ আন্না হাজাৰে৷
আন্না হাজাৰেক এতিয়া দেখিবলৈ পোৱা নাযায় ৰাজহুৱা জীৱনত৷ পূৰ্বতে কেন্দ্ৰৰ ইউপিএ চৰকাৰৰ দুৰ্নীতিৰ বিৰুদ্ধে অত্যন্ত সৰব হৈছিল এইগৰাকী প্ৰবীণ গান্ধীবাদী৷
গ্ৰাম্য উন্নয়নৰ প্ৰচাৰ, চৰকাৰী স্বচ্ছতা বৃদ্ধি আৰু ৰাজহুৱা জীৱনত দুৰ্নীতিৰ তদন্ত আৰু শাস্তি দিয়াৰ বাবে এটা বৃহৎ গণ-আন্দোলনৰ নেতৃত্ব দিছিল। তৃণমূল পৰ্যায়ত আন্দোলন সংগঠিত আৰু উৎসাহিত কৰাৰ উপৰি হাজাৰেই প্ৰায়ে তেওঁৰ দাবীবোৰৰ স্বাৰ্থত অনশন চলাইছিল৷
হাজাৰেই ভাৰতৰ মহাৰাষ্ট্ৰৰ আহমেদনগৰ জিলাৰ পাৰনাৰ তালুকাৰ এখন গাঁও ৰালেগান সিদ্ধিৰ বিকাশ আৰু গাঁথনিৰ ক্ষেত্ৰতো অৰিহণা যোগাইছিল। এই গাঁওখনক আনৰ বাবে আৰ্হি হিচাপে প্ৰতিষ্ঠা কৰাৰ প্ৰচেষ্টাৰ বাবে ১৯৯২ত ভাৰত চৰকাৰে তেওঁক তৃতীয় সৰ্বোচ্চ অসামৰিক বঁটা পদ্মভূষণ বঁটা প্ৰদান কৰিছিল।
এক কঠোৰ দুৰ্নীতি বিৰোধী আইন, লোকপাল বিধেয়ক, ২০১১ প্ৰণয়ন কৰাৰ বাবে ভাৰত চৰকাৰৰ ওপৰত চাপ প্ৰয়োগ কৰিবলৈ হাজাৰেই ২০১১ৰ ৫ এপ্ৰিলত অনশন আৰম্ভ কৰিছিল। এই অনশনৰ সমৰ্থনত দেশজুৰি প্ৰতিবাদ হৈছিল।
চৰকাৰে হাজাৰেৰ দাবী মানি গ্ৰহণ কৰাৰ এদিন পাছত ২০১১ৰ ৯ এপ্ৰিলত এই অনশন সমাপ্ত হয়। চৰকাৰে আইনখনৰ খচৰা প্ৰস্তুত কৰাৰ বাবে চৰকাৰ আৰু নাগৰিক সমাজৰ প্ৰতিনিধিৰে গঠিত এখন যুটীয়া সমিতি গঠনৰ ওপৰত এখন গেজেট অধিসূচনা জাৰি কৰে।
আন্নাৰ সেই গণ-আন্দোলনে ইউপিএ চৰকাৰৰ বিৰুদ্ধে প্ৰৱল প্ৰতিষ্ঠানবিৰোধী ঢৌৰ সৃষ্টি কৰিছিল৷ কেন্দ্ৰত কংগ্ৰেছ চৰকাৰ পতনৰ ক্ষেত্ৰতো অৰিহণা যোগাইছিল আন্নাৰ আন্দোলনে৷ আন্নাৰ আন্দোলনৰ আঁত ধৰিয়েই ব্যৱসায়িক সাম্ৰাজ্য বিস্তাৰ কৰিছিল বাবা ৰামদেৱে৷ এই আন্দোলনৰ পটভূমিততেই গঠন হৈছিল আম আদমী পাৰ্টী৷ মুখ্যমন্ত্ৰী হৈছিল অৰবিন্দ কেজৰিৱাল৷ কিন্তু, থমকি ৰৈছিল মাথোঁ আন্না হাজাৰে নিজে৷
যথাসময়ত কেন্দ্ৰত বিজেপি চৰকাৰ গঠন হৈছিল৷ আৰু তাৰ পাছৰ পৰা ক্ৰমান্বয়ে ৰাজহুৱা জীৱনৰ প্ৰেক্ষাপটৰ পৰা আঁৰ হৈ গৈছিল আন্না হাজাৰে৷ মাজে-সময়ে দুই-এটা প্ৰতিক্ৰিয়া প্ৰকাশ কৰিলেও ৰাজহুৱা জীৱনত এতিয়া পূৰ্বৰ দৰে সক্ৰিয়তা নাই আন্না হাজাৰেৰ৷ সম্প্ৰতি হাজাৰেৰ শেহতীয়া কাৰ্যক্ৰমণিকা সম্পৰ্কেও অৱগত নহয় সংবাদ প্ৰতিষ্ঠান৷ সংবাদ প্ৰতিষ্ঠানৰ পৰাও এতিয়া আঁতৰি আছে আন্না হাজাৰে৷
Continue Reading
