ডিজিটেল ডেস্কঃ এছিয়াৰ ৰাজনীতিত দেখা গৈছে কূটনৈতিক পৰিৱৰ্তন৷একনায়কত্ববাদী শাসক কিম জং উনৰ সৈতে ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সাক্ষাতৰ গুজৱে সকলোকে আচৰিত কৰি তুলিছে৷উত্তৰ কোৰিয়াৰ চৰকাৰী সংবাদ মাধ্যম কেচিএনএই দেওবাৰে প্ৰকাশ কৰা অনুসৰি ৰাছিয়াৰ ৰাষ্ট্ৰপতি ভ্লাদিমিৰ পুটিনে শীঘ্ৰে পিয়ংইয়াং ভ্ৰমণ কৰাৰ পৰিকল্পনা কৰিছে।
বিদেশ মন্ত্ৰালয়ৰ এজন বিষয়াৰ উদ্ধৃতি দি কেচিএনএই জনোৱা মতে, যোৱা সপ্তাহত ৰাছিয়া ভ্ৰমণ কৰা উত্তৰ কোৰিয়াৰ বৈদেশিক মন্ত্ৰী চ’ ছন হুইক সাক্ষাৎ কৰাৰ সময়ত পুটিনে উত্তৰ কোৰিয়াৰ নেতা কিম জং উনক ভ্ৰমণৰ বাবে আমন্ত্ৰণ জনোৱাৰ বাবেও ধন্যবাদ জনায়।
ইউক্ৰেইন যুদ্ধত উত্তৰ কোৰিয়াই আগবঢ়োৱা সমৰ্থন আৰু সংহতিৰ বাবে ৰাছিয়াই ধন্যবাদ জনাইছে আৰু আঞ্চলিক বিষয়ত সহযোগিতা আগবঢ়াবলৈ সন্মত হোৱাৰ লগতে পিয়ংইয়াঙৰ সাৰ্বভৌম অধিকাৰৰ বিৰুদ্ধে আমেৰিকা আৰু মিত্ৰশক্তিৰ উচটনিমূলক কাৰ্যক লৈয়ো দুয়োজনে গুৰুতৰ উদ্বেগ প্ৰকাশ কৰিছে বুলি প্ৰতিবেদনত উল্লেখ কৰা হৈছে।
উল্লেখ্য যে পিয়ংইয়াং আৰু মস্কোৰ মাজত সহযোগিতা ৰাষ্ট্ৰসংঘৰ চনদ আৰু অন্যান্য আন্তঃৰাষ্ট্ৰীয় আইন অনুসৰি হ’ব বুলিও প্ৰতিবেদনত কোৱা হৈছে।
Continue Reading
