ডিজিটেল ডেস্কঃ মুছলমান যুৱকৰ স’তে বিবাহপাশত আৱদ্ধ হোৱাৰ বাবে সামাজিক মাধ্যমত তীব্ৰ ট্ৰ’লৰ মুখামুখি হৈছে অভিনেত্ৰী দেৱলীনা ভট্টাচাৰ্য। কিছু সংখ্যকে তেওঁৰ হ’বলগা সন্তানৰ ধৰ্ম কি হ’ব সেই লৈও প্ৰশ্ন উত্থাপন কৰিছিল।
এই সকলোবোৰক লৈ মুখ খুলিছে দেৱলীনাই। এটা টুইটযোগে তেওঁ লিখে- “মোৰ সন্তান হিন্দু হ’ব নে মুছলিম হ’ব, সেই বিষয়ে জানিবলৈ আপোনালোক কোন? যদি শিশুৰ ওপৰত আপোনালোক ইমানেই সচেতন, তেন্তে অনাথ আশ্ৰম বহুত আছে, তালৈ যাওক। অনাথ শিশুসকলক তুলি লওক আৰু তেওঁলোকক ধৰ্ম আৰু নাম দিয়ক।”
দেৱলীনাই আৰু লিখে- “আনৰ বিষয়ে গুগলত খুঁচৰাতকৈ আপোনালোকে নিজৰ ধৰ্মৰ বিষয়ে মনোযোগ দিয়ক আৰু এজন সৎ ব্যক্তি হওক। মই নিশ্চিত যে আপোনালোকৰ নিচিনা মানুহৰ উপদেশ মোক নালাগে।”
উল্লেখ্য যে যোৱা সপ্তাহত দেৱলীনাই বয়ফ্ৰেণ্ড শ্বানৱাজ শ্বেইখৰ স’তে এখনি ফটো শ্বেয়াৰ কৰিছিল। তাত শ্বেইখনৰ স’তে বিবাহপাশত আৱদ্ধ হোৱাৰ কথা ঘোষণা কৰিছিল। সামাজিক মাধ্যমযোগে অভিনেত্ৰীগৰাকীয়ে লিখিছিল- “তেওঁতকৈ ভাল মই আৰু কাকো লগ নাপালো।”
Continue Reading
