'আপোনালোকৰ পতন হ'ব,মই অভিশাপ দিছো'! সংসদত বিজেপিক শাওপাত জয়া বচ্চনৰ

ডিজিটেল ডেস্ক: বলীউডৰ জনপ্ৰিয় অভিনেত্ৰী তথা বচ্চন পৰিয়ালৰ বোৱাৰী ঐশ্বৰ্য ৰায় বচ্চনক সোমবাৰে পানামা পেপাৰ্ছ কেলেংকাৰী সন্দৰ্ভত ইডিয়ে জেৰা কৰে। সোমবাৰে ৰাজ্যসভাত চলি আছিল ড্ৰাগছ সংক্ৰান্ত বিধেয়কৰ ওপৰত আলোচনা। ড্ৰাগছ সংক্ৰান্ত বিধেয়কৰ ওপৰত আলোচনাত অংশ লৈ থকাৰ সময়তে সংসদৰ মজিয়াত এজন বিজেপি সাংসদে জয়া বচ্চন আৰু তেওঁৰ বোৱাৰীয়েক ঐশ্চৰ্য ৰায় বচ্চনৰ বিষয়ত ব্যক্তিগত মন্তব্য কৰে।

সংসদৰ মজিয়াত ব্যক্তিগত বিষয়ে স্থান পোৱাত একপ্ৰকাৰ খঙত অগ্নিশৰ্মা হৈ পৰে ঐশ্বৰ্যৰ শাহু, সমাজবাদী দলৰ সাংসদ তথা অভিনেত্ৰী জয়া বচ্চন। ইডিয়ে ঐশ্বৰ্য ৰায়ক জেৰা কৰা প্ৰসংগত কৰা মন্তব্যৰ বিৰুদ্ধে গৰজি উঠিছিল জয়া বচ্চন। সাংসদ জয়া বচ্চনে কয়,’’সংসদত বহি তেওঁলোকে কেনেকৈ ব্যক্তিগত মন্তব্য কৰিব পাৰে? এইটো অত্যন্ত দুৰ্ভাগ্যজনক যে সহকৰ্মীসকলৰ প্ৰতি আপোনালোকৰ পৰ্যাপ্ত শ্ৰদ্ধা বা সন্মান নাই? বিজেপিৰ বেয়া দিন আৰম্ভ হ’বলৈ ধৰিছে। আপোনালোকৰ পতন হ'ব, মই অভিশাপ দিছো।‘’

পৰিয়ালৰ সন্দৰ্ভত কিয় সদনত এনে এক ব্যক্তিগত মন্তব্য কৰিব বুলি প্ৰতিবাদ সাব্যস্ত কৰি সভাপতিৰ আসনত থকা ভুৱনেশ্বৰ কলিতাৰ পৰা ন্যায় বিচাৰিছিল জয়াই। জয়া বচ্চনে ভুৱনেশ্বৰ কলিতাক উদ্দেশ্য কৰি কৈছিল – মই আশা কৰিছিলো মোক উদ্দেশ্যি আৰু মোৰ কেৰিয়াৰক লৈ মন্তব্য কৰা সকলৰ বিৰুদ্ধে আপুনি ব্যৱস্থা গ্ৰহণ কৰিব। কিন্তু আপুনি একো ব্যৱস্থা গ্ৰহণ কৰা নাই। কোনো দলক প্ৰতিনিধিত্ব কৰিবলৈ আপোনাক এই চকীখনত বহোৱা হোৱা নাই। ভুৱনেশ্বৰ কলিতাই বিনম্ৰ ভাৱে তেওঁক বিধেয়কখনৰ সন্দৰ্ভত ক'বলৈ বাৰে বাৰে অনুৰোধ জনায়। আনহাতে জয়া বচ্চনে ব্যক্তিগত বিষয় তথা ঐশ্বৰ্য ৰায়ৰ নাম লৈ মন্তব্য কৰা বিজেপি সাংসদৰ বিৰুদ্ধে কঠোৰ ব্যৱস্থা গ্ৰহণৰ আহ্বান জনায়।

আৰু পঢ়কঃ তৃণমূল কংগ্ৰেছক শক্তিশালী কৰাৰ লক্ষ্য লৈ আজি অসমলৈ আহিব অগ্নিকন্যা মমতা দিদি