দেশত ৪৫৩ জনৰ মৃত্যু! বৰদিনৰ সময়ত সাৱধান হ’বলৈ আহ্বান বিশ্ব স্বাস্থ্য সংস্থাৰ

ডিজিটেল ডেস্ক: সাৱধান নহ’লে সংক্ৰমণৰ শংকা বৃদ্ধি ক’ভিডৰ নতুন প্ৰজাতি অ’মিক্ৰনৰ৷ ক’ভিডতকৈ তীব্ৰ গতিত সংক্ৰমণ হোৱা অ’মিক্ৰনৰ আক্ৰান্তৰ সংখ্যা দৈনিক বৃদ্ধি পাইছে ভাৰতত৷ কেন্দ্ৰীয় স্বাস্থ্য মন্ত্ৰালয়ে জনোৱা মতে দেশত ইতিমধ্যে অ’মিক্ৰন ঘটনাই ২০০ চুলেগৈ৷ ইয়াৰ ভিতৰত ৭৭জনে আৰোগ্য লাভ কৰিছে৷

উল্লেখ্য যে স্বাস্থ্য মন্ত্ৰালয়ৰ শেহতীয়া তথ্য অনুসৰি মহাৰাষ্ট্ৰ আৰু দিল্লীত সৰ্বাধিক ৫৪জনৰ দেহত ধৰা পৰিছে অ’মিক্ৰন৷ ইয়াৰ উপৰি তেলেংগানাত ২০জন, কৰ্ণাটকত ১৯, ৰাজস্থানত ১৮, কেৰালাত ১৫ আৰু গুজৰাটত ১৪জন৷

ইপিনে অ’মিক্ৰনৰ ভয়াৱহতাৰ প্ৰতি লক্ষ্য ৰাখি বিশ্ব স্বাস্থ্য সংস্থাই বিশ্ববাসীক বাৰম্বাৰ সজাগ-সচেতনতাৰে থাকিবলৈ আহ্বান জনাই আহিছে৷ ক’ভিডৰ নীতি-নিয়ম মানি চলি বৰদিন উদযাপনৰ আহ্বান জনাই হুৱে কয় যে, “জীৱনটোক বিপদত পেলোৱাতকৈ কাৰ্য-কলাপ স্থগিত ৰাখিব লাগে৷ এতিয়া কঠোৰ সিদ্ধান্ত ল’ব লাগিব৷” আমেৰিকাতো প্ৰথমজনলোকৰ অ’মিক্ৰনত মৃত্যু হোৱা বুলি তথ্য প্ৰকাশ হৈছে৷

ইয়াৰ উপৰি মন্ত্ৰালয়ৰ তথ্য অনুসৰি নতুনকৈ ভাৰতত ধৰা পৰিছে ৫,৩২৬টা ক’ভিড আক্ৰান্তৰ ঘটনা৷ বিগত ৫৮১ দিনৰ এয়াই সৰ্বনিম্ন ক’ভিড আক্ৰান্ত এটা দিনৰ ভিতৰত৷ বৰ্তমানলৈকে মুঠ ৩৪৮কোটি ভাৰতীয় জনতাই ইতিমধ্যে ক’ভিডৰ কৱলত পৰিছে৷ অৱশ্যে বৰ্তমানেও সক্ৰিয় হৈ আছে ৭৯,০৯৭টা ঘটনা৷ বিগত ২৪ ঘণ্টাত ৪৫৩জন ক’ভিড ৰোগীৰ মৃত্যু হোৱা বুলি তথ্য প্ৰকাশ কৰিছে৷